الاثنين، مايو 26، 2008

ثعلب رمادى ببدلة بيضاء أنيقة


قبل كم أسبوع
عندنا هندي بالدوام.اشوفة كل يوم يمرني..يسأل عن صحتى
عن السكر..و هاو از يور دايبيتيس..
انا فى بالى أقول فيه الخير و الله
بعد فترة..يانى يتسحب
بومريوم..و الله لقيت لك دوا عجيب حق السكر
يشفى من السكر و من الامراض و يعطيك حيوية
دوا عجيب..
شنو هالدوا العجائبى؟
ثانى يوم يايب لى الدوا..
كيس مخمل أحمر.....انا قلت اكيد بيطلع منة ريل غراب و لا منقار طاووس مطحون
بطل الكيس و لا داخلة قرص زجاجى مدور..
هذا شسوى فية؟ آكلة؟

رد على
لا لا
هذا اسمة البايو دسك..تحطة بالماى لمدة يوم
و بعدين تشرب ماية..القرص يغير تركيبة الماى الجزيئية

يعنى نقعة و أشرب ماية
الله يهداك يا شنكر..هذا علاج كويتى قديم

ما علينا..نجربة
كم سعرة؟
250 دينار!!
انا سمعت ميتين و خمسين طلعت عيونى...و الله يا شنكر لو بتبيعنى البنكرياس مالك ما شريتة بهالسعر
المهم قعد يحن على راسى و كل يوم يايب لى اوراق و دراسات عن البايو دسك..
لين يأس..قال لى شرايك تحضر ندوة مسوينها بالكويت عن البايودسك؟
انا وافقت..خذيت العنوان..و رحت
المحاضرة كانت بفندق..دشيت و لا فى زحمة شوى..اغلبهم هنود و فى كويتيين وايد
و انا انطر فوق فى يمى شباب كويتيين..قطيت اذنى عليهم طبعا كالعاده

اسمعهم يتكلمون عن اشياء غريبة و تجارة و شركة اسمها كويست نت
المهم انا قررت احضر المحاضر اللى بالانجليزى
دشيت و لا المكان متروس هنود..الطبقة الفقيرة جدا منهم

و محاضر يتكلم عن طريقتهم التجارية و طريقة الربح المضمون و ان ممكن بحسبة بسيطة تصير مليونير بسنتين
و ين البايو دسك؟
آخر شى...طلعت السالفة نصبة عودة
طلعت هذى شركة تجارة هرمية..و هو مبدا غش معروف

المهم مسكت شنكر و قلت لة
زين اننت تقول هالبايودسك يطلع طاقة..شلون؟
هل هو مشع؟ اذا مشع يعنى ممنوع يتداول بالكويت
و اذا مغناطيسى يعنى ممكن قراءة هالطاقة....

اما انك تشربنى الماى و تقول لى انك راح تحس بالفرق..ما تمشى علينا
و الله لافضحكم و افضح نصبكم
شوى و لا داق على مديرهم بلندن..كلمنى المدير و قلت لة نفس الكلام..
ثانى يوم داق واحد سعودي..و هم قلت لة نفس الكلام....
و اليوم ابتدوا اسلوب يديد..
التهديد...شدعوة؟
انا ما قلت شى غلط

عطونى 3000 دينار و انا اسكت عنكم و عن شركتكم:)

هناك 12 تعليقًا:

Diver يقول...

افا يا بومريوم لا تخاف كلنه معاك
انت قاوم و لا تخاف نسويلك تابين اذا صار شي فيك
كلنا وراك يابومريوم

Bad-Ran يقول...

بس 3000 ؟!
صج فقير :)

ARTFUL يقول...

اي والله بس 3000 زيد الله يهداك

(=

والله زين تسوي فيهم

HalfCup.net يقول...

أهم شي عنوان مواضيعك أحس إني مندمج

Maximilian يقول...

شخصيا انا كنت ضحية لاحدى شركات النصب بالتجارة الهرمية

هم جذي جاني احد اقربائي ولين اقنعني ادش بشركة اسمها بزناس وكان تخصصها برامج كمبيوتر مع موقع على دومينهم التعبان اللي اسمه بزناس

المبدأ ان كل العملاء يكونون سمامسرة لصاحب الشركة اللي حاط ريله على ريل وتيييله الفلوس واهو يطالع غباء المشتركين ، اعرف واحد غامر وشرى اسهم بمبلغ كبير من الشركة وراحت عليه

حاليا قاعد ادور اسم الشركة عالنت ماكو لها اثر انقرضت تماما

وهم اكو مالت الدايموند بعد

LiL ALiEN يقول...

عندي صلبوخ تنقعه بماي صليبي وتشربه يعالج الرموش

تبي تاخذ مني بالطيب ولا ادزلك المندوب يهددك بالقتل ؟

EXzombie يقول...

اشوه قال لق نقعه ما قال لك تمصه و لا شي اخطر من جذي......!!!؟

عندي واحد من الشباب اقنعني اني اشترك معاهم بشركة من نفس النظام و عجبتني الفكرة، اهو اقنعني بس ما رحت و كشت فيهم.....!!!؟

هذول على سالفة مركز الراشد و تجارة البرمجة اللغوية العصبية على دكتور فيل و اوبرا كلهم حجي فاضي

sun shine يقول...

مساء الخير
هذي اول مره اتصفح مدونتك و الصراحه تونسه و تعبر عن الشارع الكويتي الاصلي و بنسبه للموضوع هذا بغيت اطيح فيه بس الحمده مادري شلون سويت استخاره و طلعت موزينه و انحشت منهم

esetch يقول...

أفأ

ما عاش إللي يهددك يا بومريوم

أدزلك جبور بوضروس وأحمدو كوجاك والفذ بوعواطف

بودي غاردات ويطربؤولك الكباريه

بومريوم يقول...

دايفر
بس شرط تسمونى بطل المقاومة و التحرير التشريبى

بدران
شنسوى..فقير لى عطيتة الف دينار يتوهق

artful
لا حرام:)

halfcup
شكرا:)

ماكسميليان
شركة بزناس لعبت لعب
و اللحين هالشركة:)

lil alain
لا يبا نشتري..
ينخاف منك اللحين عقب تحالفك مع طيبة الابراهيم

اكزومبى
مركز الراشد يبيلة ستين بوست:)

sun shine
و شلون عرفت عن المدونة؟
حياك اللة و ان شاء الله ما تقاطع


estech
قدها قدها
لا يبا هذول خشهم حق المظاهرة القادمة
نبيها نص دائرة

غير معرف يقول...

مع الاسف الشديد ان اجد مثل هذا الرد من قبل شباب ينتظر منهم العالم الجديد في مجال الطاقة والتطور والعالم باسره وصل القمر وانتم لازلتم على باشه ولحمة راس ومجبوس ومع ذلك تريقه على العلم والعلماء ووجدت لك من يطبل لك ان التقنيه التي تتحدث عنها اسمها نانو تكنولوجي وهي الطاقة متناهيه الصغر او اصغر وحده بمعنى انه يمكن تصغير اكبر ثور من اللي مايفهم ووضعه بحجم ذبابه فهمت والا لا نصيحتي ابحث زين وراجع نفسك بدل المطامر في النت بشي لاتفهمه

bo_sale7 يقول...

هذا الغير معرف انسان عبيط وشكله متورط يبي يبيع الاقراص اللي عنده وانت خربت عليه