الخميس، أبريل 24، 2008

أيها السادة المرشحين....طز فيكم

يحليلة ناصر الصانع باعلانة التلفزيوني...
لا و حاط اللون بنفسجى...نسائى
و يتكلم عن مخرجات التعليم..و يتكلم عن الصحة و ان مو عاجبة الوضع الصحى
يا اخى خل هالسوالف حق مرشح يديد يقص علينا فيها
مو مرشح صار مخلل بالمجلس

مواقف ناصر الصانع عبر سنوات المجلس "جعل والديك للجنة يا مايكل هيرب"

الفحم المكلسن 2007 رفض الاحالة
إسقاط القروض 2006 رافض لإسقاط القروض "هذى عشان ليتل الليلن عج"

حقوق المرأة السياسية 2005 رافض القانون " و ركزوا على هالنقطة لان فى شى ياي بالطريج"
حقوق المرأة السياسة - الانتخابات البلدية 2005 رافض القانون / ممتنع
طلب احالة حقوق المرأة السياسية الى المحكمة الدستورية 2005 لا يطلب "همين هاى ما تريدها"

طرح الثقة بالنوري 2004 مؤيد طرح الثقة
طرح الثقة بشرار 2003 معارض لطرح الثقة" ليش"؟
طرح الثقة بالربعي 1995 مؤيد طرح الثقة "برضوا لية؟"

النكتة العودة...هالخبر من موقع الصانع الرسمي

الصانع: قانون الحقوق الاجتماعية للمرأة سيكون على أجندة مجلس الأمة المقبل تاريخ النشر: 2008-04-19اكد النائب السابق مرشح الدائرة الثالثة الدكتور ناصر الصانع ان المجلس المنحل كان له التوجه الحقيقي والدور الجوهري في دعم المرأة ومتطلباتها، وذلك من خلال تقديم نواب الحركة الدستورية الاسلامية مشروع قانون يتعلق بحقوقها المدنية والاجتماعية مبينا ان ذلك القانون يعتبر اول قانون قدم بعد الجلسة الافتتاحي.... [المزيد]

قول و الله؟أحلف؟
زين اذا انت كنت مو شايفها كفو تصوت و ترشح..أى حقوق تتكلم عنها؟

الثانى اللى ملوع جبدى هيثم الشايع
امس و انا آكل تشريبتى المسائية..و لا لقطات من بيت القرين و شهداء بيت القرين
عبالى فلم وثائقى استانست..لان احنا ما نذكرهم الا يوم واحد بالسنة...
الصدمة ان هاللقطات هى أعلان للمرشح الغير محترم
يا اخي طز فيك..الشهداء لهم حرمة
و الشهداء صاروا شى منسى ...صاروا حسرة بقلوب اهاليهم
من عطاك الحق تتاجر فيهم؟
لا و النكتة برنامج الانتخابى..
خلكم معاى التالى منقول بالحرف من موقعه Ctrl+C:

إخواني وأخواتي
كما قلت لن أرفع شعارات وعناوين براقة لأنني أثق بأنكم على درجة عالية من الفهم والوعي السياسي والإجتماعي "شى حلو"

أولويات المرشح هيثم حمد الشايع
الوحدة الوطنية : مؤتمر وطني يشارك فيه مختلف القوى السياسية ومؤسسات المجتمع المدني
الكويت مركز مالي وتجاري : تشريعات جديدة وخطة واضحة المعالم قابلةللتنفيذ
"بايقها منى"
الخدمات الصحية : ابعاد السياسة وإيجاد ادارة فعالة
التربية والتعليم : معالجة الخلل بين مثلث التعليم وهو المعلم والإدارة والمنهج
الرياضة : ابعاد الصراعات السياسية وتشجيع الاحتراف وبناء منشآت جديدة
البطالة : إصلاح العلاقة بين العامل والعمل وتبني مشاريع استثمارية لخلق فرص عمل جديدة
حقوق المرأة : المساواة في الترقيات والمناصب القيادية ومنحها الحق الاجتماعي كاملاً

ياواش ياواش..شفيك دايس..حبة حبة
هذا و انت تقول مو شعارات براقة و ابى اختزل و جذى...لو ماتبى جان شقلت؟
نق وحدة...ثنتين..مو كلهم مرة وحدة

برة الموضوع
فى واحد من المرشحين بالخالدية حاط شعارة
نبض جديد..
ناقص يكملها نبض جديد...شفرولية

لو حاط يفرض هيبتة وايد أقوى الله يهداك




هناك 21 تعليقًا:

Q80 Blogger يقول...

والي مايشرب لبن اشلون؟

اتوقع مشكوك بوطنيته !

Maximilian يقول...

امس و انا آكل تشريبتى المسائية
--------------

توني ادري انك تاكلها طول السنة :)

يا اخى خل هالسوالف حق مرشح يديد يقص علينا فيهامو مرشح صار مخلل بالمجلس



looooooool

بو مريوم اكتب على طول :D

Mohammad Al-Yousifi يقول...

علاقة الغزل بين الدينين و المرأة غريبة

لوول

nEo يقول...

lol

naaaar

esetch يقول...

والله الحق وياك بس شنسوي بالأوادم معجعجين بالكرسي

بس بصراحة يعجبني تمسكك بالثوابت والمكتسبات أكل التشريب

joy يقول...

أهم شي التشريب
بقول حق الطباخ يسويلي الحين يمدي؟


والصانع صراحة أكبر دليل يمشي على الارض على الدينين النصابين
مو كلهم ولكن اهوا حالة أخرى لله يعلم حاله قبل وحاله الحين

الحين ايجهز حق بنته اميلانو وباريس
طييييييييييييييييييط


والشايع مثل ماقلتلك حالته صعبة وايد حتى المقيم داش بالموضوع
عاوز يكوووش عالكل
محد قاله انه المقيم والداخلية ما يصوتون الظاهر
مسكييين بومبة محترمة بيحصل

White Wings يقول...

يقولون تنزيلات محلات الشايع هالأيام في الأسواق دعاية لهيثم
:)
مشكور على تعريف كلمة لفو، والله خدمتني
:)

mantovani يقول...

الحقيقة انا ماني قادر افهم السيد هيثم الشايع ,,,


يعني ليش مستغل الشهداء و الابار و نبيها خمس بالانتخابات

حتى لو كان في مبررات و تخريجات و ترقيعات
مقنعة , الناس نطقت

معقولة في ناس ما تحترم بهالطريقة ؟؟

متفرغ يقول...

مرشحنا اذا تبي مفتاح انتخابي يداوم من لندن ترا حاضرين .... اسوي لك دعاية و مخيمك فدخلة الهايد بارك اللي يم السفارة الكويتية علشان الناس اول ما تطلع تروح هناك و تصوت لك على طول :)

Bad-Ran يقول...

زين تسوي فيهم

Don Juan يقول...

بالضبط بالضبط لما أشوف هيثم الشايع بالتلفزيون ولا الجريدة اييلي نفس الإحساس الي يحسه الانسان بعد ما ياكل علبة حلاوة طحينية ( رهش بالكويتي ) و يحلي وراها بقلاص دهن كورولي و طاسة سمن عربي ... نفس الإحساس بالضبط :p

mtfa2el يقول...

الصانع ..شفته اهو و الشايجي باعلان واحد ملزقينه على البيوت عبالهم
star warsاليديد
هيثم الشايع
money talks
ولا شفهمه بالحجي..خله يجابل وفد قيرقستان احسن

JuVeNTiNa يقول...

على هيثم الشايع .. شفييييه الله يهداه ! اليوم حاطين ندوته والله انه فيه بلا !! ليييش يصاارخ و معصب شنو يعني هذي ندوته و في بيته على شنو يصارخ الله يعين لو يدش المجلس شيسوي !! ما عنده سالفه واضح انه متدرب على طريقه الصراخ و الانفعال و الاوضح انه كلامه مو من قلبه .. مع اني كنت متفائله خير فيه بس عقب الندوة لا والله يفشل .. لا و يتكلم عن غلاء الاسعار و ستاربكس ماكو على اسعارهم ! ليش يناقض نفسه ؟!!!

شرقاوي يقول...

بو مريوم،

check your e-mail

:)

J Daily يقول...

بو مريوم بسك من هالسياسة

على فكرة عندي جم حبة كرميل لوق
تشتري بـ 5 اضعاف السعر؟ (:

enter-q8 يقول...

هدي اعصابك
http://www.enter-q8.com/brlman.jpg
ترى قاعد اجهزلك شي
انت و الحجي استيفان

EXzombie يقول...

لداعية الطهطاوي الاكزومبي يعلن رسميا دعم مرشح التشريب بو مريوم

روح وفقك الله، بالدايرة الثالثة صح علشان في واحد نبي نطيحه.....!!!؟

غير معرف يقول...

http://www.aljarida.com/aljarida/Article.aspx?id=57696

ساجد قام من النوم بعد اسبوعين و كتب عن الموضوع ..اعتقد ماخذ له لفه على المدونات و شاف موضوعك

بومريوم يقول...

q8i blogger
من لا يشرب اللبن ليس منا..و مشكوك بولائة للقوى التشريبية التقدمية

maximilian
و الله محد رافع معنوياتى الا أنت:)

مطقوق
يعنى ما شد انتباهك الا هذى:)
حبيب بو سلمي

neo
و القادم مذهل اكثر:)

estech
لا تنازل و لا استلام عن مكتسباتنا التشريبية

اللومى هو الحل

joy
:-X

white wings
لا و يتكلم عن الغلاء
يا اخى حط ببرنامج تخفيض اسعار ستار بكس على الاقل

mantovani
الغاية تبرر الوسيلة
ان شاء الله يبط و ما ينجح


متفرغ
الله يسلمك
هذا العشم:)
انتظرونى فى الانتخابات القادمة


bad-ran
عاد يفيد فيهم...غاسلين ووجوهم بمرق شبزى بايت

Don Juan
ادرى و الله
يغث

متفائل
حدس عاد مبدعين
شوف أعلاناتهم...بنفسجى على وردى

JuVeNTiNa
مقصة..عبالة الصراخ يعنى المصداقية


شرقاوى
صار معلوم عمي...استلمنا و ارسلنا


يعقوبوو
ما اقدر ابطل سياسة
و الله حتى مريوم تقول لى ذاك اليوم يبا بسنا اخبار...24 ساعة اخبار
بسنا
و مابى الكراميل لوج...ابى الصور اللى انت خابرها


انتر كويت
لووول
حسبى الله على ابليسك

أكزومبى
ادام الله ظلك العالى و جعلك ذخرا و فخرا للمدونين الكويتيين

فتاة نيويورك
عادى...احنا هنى طايح حظنا
البوق منا حلالى

kuwaitya_7saweya يقول...

لوووووووووووووووووووول
نبض جديد لووووووووووووووووووووول
بدعت والله

bisso يقول...

يا اخوي الكويتي المحترم من حق كل واحد انه يعبر عن رايه بكل صراحه بس مع الاسف ليش الهجوم على المرشح هيثم الشايع انا اقول اذا الواحد يتبع تيار او تحالف او طائفه مو معناته يحارب المنافسين , عالأقل المرشح احسن من غيره على اقل تقدير المفروض الواحد يقول عنه كلام طيب لانه قاعد يثبت نجاح الشاب الكويتي في جميع المجالات احنه اليوم نبي المصلحة العامه صج ان في ناس وايد مايستاهلون المجلس وقاعدين يتفننون في اللف والدوران بس انا شايف ان هيثم ليلحين ماشي عدل ومو من المنطق ان نفسر دعاياته الانتخابية تفسير خاطيء .