مسكين الخيشى...
كل شى فية غير عن المخملين...
حتى بوكة غير...
ليش بواكة الخيششين تتشابة؟
:بوك الخيشى مواصفاتة كالتالى
دايم يكون متفوخ...مليان أوراف و مربوط بسير-
متروس كروت مطاعم كباب و مطعم مندى-
لازم أكو ربع مشقوق و ملصق بتيب-
صور عيالة السبعة مصورهم بمصور الجمعية..الخلفية زرقا و لا مخمل أحمر-
مليان وصولات مكينة السحب الالى..ليش محتفظ فيهم ما أدرى-
عشر دنانير مصفوطة و مخشوشة بجيب البوك-
لازم فية صورة ضابط...ولد عمة و لد خالة بس لازم صورة ضابط-
نسخة من دعاء جلب الرزق-
اعلانات مشقوقة من الوسيط..صباغ, نقل عفش-
أما بوك المخملى..
صغير..ذرب-
5 كردت كارد كلهم بلاتينيوم-
ثلاث أنواط بو عشرين..أقل من نوط بوعشرين بطفاية السيارة-
كرت مدير الحفلات بالهليتون-
كرت مدير الحفلات بالشيراتون-
كرت مطعم أنطونيو بجنيف -
صورة بنتة الوحيدة او ولدة الوحيد ..ملمعة من فوتوكينا -
كرت الاشتراك بالكورنيش كلوب-
و فى شغلة محيرتنى بالخيشيين
ليش يحبون يجلدون كل شى؟
لى شرى سيارة جديد يجلد كشناتها
عقد الزواج مجلده
لو يحصل لة حتى بطاقة السحب الالى جلدها
هناك 16 تعليقًا:
lol
nice one !!
مواصفات بوكي هي كالتالي:
لوي فيتون، جلد، يحتوي على بطاقة البنك (ولا احب حمل بطاقات الكردت إلا للضرورة - آنا عتيج واحب الكاش، ليسن السياقة، البطاقة المدنية، بطاقة العمل، بطاقات "بزنس كاردز" خاصة فيني + بعض البطاقات الأخرى التي حصلت عليها مؤخراً و لم احفظها في الرولودكس حتى الآن - انواط مختلفة من جميع الفئات، و ... بس
بالنسبة للخردة المعدنية، لااحب حملها وسماع قرقعتها في مخباتي. طفاية الزغاير بالسيارة تحتوي على الـ٥٠ والـ١٠٠ فلس(تعرف لزوم المواقف)، ولااحبذ ان تختلط بالعملات الاخرى التي لا احب ان تتراكم لدي واتخلص منها اولا باول
الحين انا شطلع، خيشي ولا مخملى؟
في خيشيين يابومريوم(احنا) حتى ما عندهم بواكة الله يرزقنا
لوراق و الخردة (ماكو انواط) مقطوطين بالمخبا
الله يعين
ما تعرف لمية فلس من سويج السيارة
و على سالفة التجليد الله يسلمك نخاف ان الشي لا شريناه يتشقق من لستخدام
اما اخوانه المخمليين مايهمهم يتشقق يخترب يشترون غيره
LOL
So true !
مادري شلون تطري على بالك هالسوالف
:p
::
انا عندي عادة غريبة .. بعد ما أرد من كل سفرة مستحيل أطلع فلوس الدولة اللي كنت فيها من بوكي ، إلا بعد مدة . مرة من المرات ، كنا رايحين البحرين - بدون مبالغة - قعدت باجي خردتهم في بوكي أكثر من سنة
مادري هل هو عيز .. كسل .. ما عندي مكان لهم ؟!؟
ماني عارفة شنو تفسير هالموضوع
أنا صور زوجي وعيالي بالبوك عندي بالشنطة, وياليت صور جمعية وبخلفية زرقا, إلا طباعة من البرنتر إللي بالبيت
:(
الشغلة هذي تخليني خيشية وإلا مخملية؟
وانت توصف البوك الخيشي..جنك قاعد يمي وتشوف بوكي
ولا ازيدك من الشعر بيت في اوراق ووصولات مالها لزمة في مخبة الدشداشة اللي فوق
اعتقد ان الخيشي بسبب وضع كل هالاوراق في بوكة يمكن يتحلم انه فيه فلوس جدام الناس
نسيت
الخيشي الي يصور بطاقة المدنية بألوان
ويقصها ويلزقها ويجلدها ويضبطها
واذى ماعرفة ليش
انت مو خيشي
لووول!!
الله يقطع ابليسك .. بروح انظف البوك .. الظاهر مواصفات الخيشي ستاندرد
ونسيت شغله مهمه موجوده في بوك الخيشي .. 3 كروت مالت شركة طفل المستقبل وكلهم مافيهم رصيد
لمياء الحالمة
اكيد زوجج ضابط .. او عيالج ضباط :P
آنا خيشية حتى النخاع .. بس بوكي هدية من صديقة مخملية
يعني من بره هللا هللا ومن جوه يعلم الله
مادري السنة ما يخافون من الحسد؟
ليش بواكة العيم كلها حروز؟
انا حاط ببوكي عشرين حرز و حصن الحصين
لوول
أقدر أقول وبكل فخر واعتزاز..ان مواصفات البوك الخيشى كانت تنطبق على بوكي بالتمام والكمال (عدا صورة الضابط) على بوكي قبل عامين ايام ما كنت ابني البيت..أما الآن وتطبيقا لخطتي المتبعه (مخملي 2010)..فان الاوضاع تتجه نحو البوك المخملي بخطوات واثقه..واستطيع القول انني انجزت ما نسبته 50 بالمئة..وأتوقع انجاز المهمه في نهاية 2009..ادعو بالتوفيق يا بو مريوم..
LOL
"نسخة من دعاء جلب الرزق"
KaAak
I take your words
أهم شي انك صرت مقياس و مرجعية رسمية للتخيش او التمخمل
الوالد ما يعترف بشي اسمه يخزن ارقام بالتلفون حيل طايح له بهالكروت و مربطهم بسيوره
و بالنسبه لبوكي فيه :
فيزا الوطني - الكترون طبعا
كرت مطعم زهرة تونس - عليه خوش عرايس
فلوس مافيه بالوقت الحالي
Neo
Thanks
demon
لا يبا انت مخملى...عمرك شفت خيشى عندة ماك؟
diver
و المخبة دوم تقرقش..و الارباع كلهم فوق
broke
ما تطرى على و الله...انا أكتب الواقع
لمياء
لا انتى مخملية باعترافك...
بس يمكن فيك بخل شوى:P
karakota
كل الخيشيين يتشابهون
بس فى أشاعة قوية طالعة عليك
ان البيت اللى كنت حاط صورتة بيتكم
ناصر الكويت
ليش بعد..أكيد عشان يرهنها عن راعى الدكان او الكراج
lil
انت خيشى بجدارة
alia
من يقول؟
انتى خيشية؟؟؟
انا شطلع عيل؟
كلة مطقوق
احنا نحط صورة الشيخ النهام
تبعد الحسد و الشياطين و تنوم اليهال
حمد
الله يوفقك و يرزقك و تصير مخملى...
و اللى عطاك بملاس يعطينا بقفشة
acid
حياك الله بالمدونة
chill
لا ونعطى شهادات مثل الايزو
خيشى 2001
Certified
أبو اسحق
حياك الله بالبلوق
الله يطول بعمره
الشياب قصة ثانية:)
لا يبا انت مخملى...عمرك شفت خيشى عندة ماك؟
يمكن شاريه اقساط :-/ مثل إللي يشتريلك سيارة بعشرات الآلاف و تشوف بيته لو حمامه تقعد على السطح يتهدم باللي فيه
إرسال تعليق