الخميس، يوليو 17، 2008

المتسلقون على حوائط الزمن


بما ان العرفج صار نبتة الكويت الرسمية

انا أقترح ان البريعصي يصير زاحف الكويت الرسمي..

فبعد كل تلك العشرة فى شقوق الاحواش المتهالكة..

و المطاردة بالنعل اجلكم اللة و الام صكمات..

و الضرب المبرح بدون سبب فقط لرؤية رقصة الذيل

أقل شي ممكن ان يعمل تقديرا لخدمات البريعصي الجليلة هو اعطاءة اللقب الرسمى

و عمل تمثال لبريعصى مفقوص بنجدية فى احد الدوارات

طبعا الخدمة الجليلة اللى يسويها البريعصى هى قضاؤة على الزهيوية



و شكرا

ادعمنا بتوقيعك للعريضة...



ايضا سيتم التحضير لمهرجان خطابى ضخم و مسيرة الى مجلس الامة

-----------------------------

برة الموضوع
6 أغلى مطاعم في العالم

إعداد: خالد كبي (كبة بالبنانى)


هناك 24 تعليقًا:

Q80 Blogger يقول...

تره البريعصي كان له دور كبير في التحرير
نص شبابنا كانو خبره بالاسلحه من ملاحق هالحيوان البريء

الصمود اغلبه كان صوب بيوت الحكومه .. وهذا دليل قوي .. لأنه هل مخلوق يتكاثر في هالبيوت الحضاريه العريقه

وهم كان له اسهامات في اخافت جنود صدام .. لأنه يعتبر اخو التمساح من امه

Mohammad Al-Yousifi يقول...

أنا أرشح الزبيدي

J Daily يقول...

تمثال مره وحدة؟
تبي الهايف وطبطب يعصبون؟ (:

كويــتي لايــعه كبــده يقول...

أوقع ليش ما أوقع

كويــ لايــ كبـده ـعه ـتي

(ولا توقيع وزير)

وعطوه جنسية بعد... خدماته الجليلة أبرك من اللي يغنون ويمثلون بكثير.

كويــتي لايــعه كبــده يقول...

سلامات يا الغالي بو مريوم
أجر وعافية

السموحه ما لاحظت الا الحين

غير معرف يقول...

اي شي ضد الزهيوي انا معاه

Diver يقول...

الاقتراح الصحيح اهو بريعصي و زهيوي الاثنين اهم الشعار الرسمي اذا صعب انخلي بريعصي و هو قاعد ياكل زهيوي

violinist_q8 يقول...

حلوا النوّير و اختاروا العرفج ؟
صج ذوق يدل على اشياء وايد !!
لخبطه مابعدها لخبطه

Maximilian يقول...

تصدق عاد

اول يوم من ردتي الكويت استقبلني بريعصي بالغرفه، واكل نصيبه المسكين

LiL ALiEN يقول...

وايد شغلات لازم تميز عندنا

الغبار

الرطوبة

البريعصي

ليل ايليين

وعندي اقتراح لازم يطبق .. لأنه المردود المالي راح يكون مو طبيعي

ليش تقريبا اي دوله تروحلها .. نلاقي حاطين صالة "ارتفشل سنوو" تزلج على الثلج وهالشغلات

ليش حق الشتاء ماعندنا "ارتفشل ساند ستورم" .. علشان لانشتاق .. وهم منها نفتح بالمالديف والبهاما واوروبا



واخيرا .. تقرير المطاعم فاشل .. وين ترتيب مطعم بدر البدور او الغدير ؟

شرقاوي يقول...

بو مريوم،

سالفة العرفج.

حدثني من لا أشك في روايته، بأن الأوامر العليا صدرت لهم، قبل عدة سنوات، بالعمل من اجل المحافظة على العرفج الذي انقرض من البر. و بعد بحث طويل، أضطر المدراء الإستعانة ببنك للبذور في بريطانيا، و اعتقد بأنه البنك التابع لحدائق كيو في لندن
Kew Gardens
و تم استنبات البذوربالمختبرات ثم شتلها في المحمية، و مزارع كبار القوم.

البريعصي.
هالمسيكين، الله يستر عليه.

iDip يقول...

عجبني العنوان
ذكرني بمطلع قصيدة لمحمود درويش

أيها المارون قوق الكلمات العابرة
احملوا اسماءكم وانصرفوا

joy يقول...

اي صح البريعصي

أوقع



وبعدين انا قريت المطاعم وشقيت الورقة قلت عل وعسى اروح صوبهم واكل فيهم وبدز لك التقرير الخيشي للذواقة جوي اذا يسوى المطعم ام لا

سرحان يقول...

ياخوي... خوفك الضبان (جمع ضب) يعترضون و يسوون "فرعي" بني ضب و يطالبون بإشراكهم في الموضوع لأن لهم ثقل!

غير معرف يقول...

ذكرتني بزميلة لي في العمل طلع بمكتبها بريعصي وقامت تصارخ ودشت على مديرنا تقوله ابي اغير المكتب وتتنفس بسرعة

قالها: ليش؟
قالت: في بريعصي بمكتبي!!
قالها: اي مافي شي .. البريعصي صديق البيئة.. انتي لو طالع لج "ورل" ؟؟ (يعني يكون يبي يرحيها نفسيا كع كع كع

غير معرف يقول...

استغفر الله

mo3ath يقول...

اهم شي الذيل :)

الواحد صار سنايبر من وراهم ، احذف نعال من بعيد وحوشه :q

بومريوم يقول...

q8i blogger
عشان لا تلومنى اذا اقترحت
يعنى بطل قومي و قدم تضحيات كبيرة

مطقوق
الزبيدى مو كويتى

يعقوبوو
بطوفها لك هالمرة:)
لا تقول الهايف
انا بروحي شايل عليك من سالفة الصور

كويتى لايعة كبدة
اشعرك على دعمك لقضيتنا العادلة
و الله يسلمك الشر ما يجييك:)

حمودي
لا تييب طارى الزهيوية
صارت لى سالفة قبل كم يوم..
مأساة

diver
نخلى اربع بريعصية قاعدين يطعنون زهيوى...
و نسمى التمثال..
الشجاعة

violinest
عاد كيفهم
انا زهرتى القومية النوير

ماكسميليان
حمد الله على السلامة:)
دام باستقبالك بريعصى اكيد بتشوف الخير
بس عسى استخدمت الاساليب العلمية فى قتلة
الموت الرحيم

اللين
خلاص نسويلك انت تمثال بعد
انت و العتوى مالك

العزيز شرقاوى
احنا محد مضيعنا الا هالمخمليين
العرفج فايدتة الوحيدة شب النار
مزرعة العرفج اهى الحل..
تشاركنى؟
عندى صديق مخملى حدة داز لى ايميل من سويسرا يقول يبى يسوى مزرعة عرفج:)

idip
عندى انا قصيدة بعد عن البريعصى و علاقتة معانا و سكنة فى شقوق الزمن

joy
مالى شغل بالتقرير
انا قصدى اسمة كبة و مسوى تقرير عن المطاعم
بعدين منو خيشى؟؟

سرحان
لا الضبان موافقين
المهم احد من العايلة يمثلهم
بعدين البريعصية هم الفرع المتحضر من العايلة:)

m
لو انا من المدير جان اطلع قرار ممنوع قتل البريعصية
و اللى يذبح بريعصى ماكو مكافاة سنوية

والموت يعشق فجأه مثلي..والموت مثلي لايحب الإنتظار
يوم قريت الاسم سمعت موسيقى الجنائز بالخلفية...
و نعم بالله
لا الة الا الله
وحدووووووووووووووووووه


معاذ
الحركة الخايسة اذا حذفتة بالنعال و جبل صوبك...
و البلوة اا دش بالمكسر
ياااااااااااااااو
" صارت فينى"

العاصي يقول...

شعار الكويت لازم يكون الرد لايبل

cheers

بومريوم يقول...

العاصي
شنو انت توك متعلم تشرب؟
خلاص يبا درينا انك قوى و شريب و مو هامك أحد

mtfa2el يقول...

بو مريوم انا فاتح بلوقك ولا أسمع
money money money
أفا طلعت مخملي !!؟؟

Q80-ChillGirl يقول...
أزال المؤلف هذا التعليق.
ya3ssof يقول...

انا اقول يستاهل البريعصي رمز الشجاعه .. ولا يطلعلك واحد رابي طول ذراعك ويلحق بعد .. في احتمال اهو اللي يطلع الزنوبه ويهدد !!

ya3ssof يقول...

انا اقول البريعصي مثال للشجاعه لاتغلطون عليه ..
خصوصا اذا طلعلك رابي طول ذراعك !! اهو اللي يلحقك بزنوبه يقولك اشتبي يالحبيب ؟؟