الاثنين، أغسطس 11، 2008

ثريد ملكى بمرقة الشعوب المطحونة


ليش المخمليين ما عندهم ذوق بالاكل...
و دايم يغصبون روحهم على اكلات باصجة بس لان سعرها غالى؟

ذاك اليوم داق على صديقى المخملى حدة...
بومريوم عازمك على العشا..تو واصلنى فواجرا من باريييز
فواجرا و عشا...عزومة ما تنرد..
وصلنا البيت بعد التحيات و السوالف و بعض الضحكات المصنطنعه..
تفضلوا على العشا...
شوى دش السفرجي مع الصحون..
ها؟
وين الفواجرا؟
رد المخملى حدة..هذى الفواجرا..
افا...
فواجرا و فواجرا و آخرتها جبود بط..
يبا احنا يوم و ترك ناكل فواجرا..بس جبود دياى ..و محموسة
و نسميها معالييق...وا

و قبلها ذبحنا بمطعم اسمة انتركوت..هم بباريز
ذاك اليوم داق على ...ابشرك...فتحوا انتلركوت بالكويت
لازم اعزمك
ماشى
كشخنا..و لبست دشداشتى الشد...
دخلنا المطعم..شوى وصلت الجرسونة...شلون تبون الستيك؟
ها؟ و ين المنيو؟
ذكرتنى بمطاعم الكشرى لى دشيت
ماكو منيو...بس يسالك عايز الكشرى ازاى..بشطة و لا من غير
المهم
وصل الطلب...شوية بطاط و لحم محموس؟
افا..هذا انتر كوتكم؟
ناقص جباتى بس و يصير ريوق مطعم هندى..
قيمة

اما السوشى ف على كثر عزايمة لى الا انى مو قادر اقنع نفسى
عقب المطبق المحيوف و الدهن العدانى تبينى آكل سمك نى ملفوف بعيش ابيض
تأبى المروءة

تهقون لو ساكت عجيب يفتح فرع بالراية و يغير اسمة الى L'incroyable silence

يكسر الدنيا و الناس تصف طوابير؟

هناك 21 تعليقًا:

ابو لطيف يقول...

هههههههههههه

جزاك الله خير

اتهقى الـ فواجرا لها علاقة بالفياجرا ؟

يعقووبوو يقول...

حتى لو مطعم جمعية تفتحها بالراية يربح (:

Kwaitiyya يقول...

ههههههههه
لا والفوتشيني
عبارة عن قبوط بالجبن
هههه عجيب البوست

ملاحـظـة يقول...

و انت اذا خيشي شماله لابس دشداشه شد
هذي يلبسها بو مليون و طالع

و اذا الله رزقه و صاروا مليونين يركب بزمات

عاد بو ثلاث ما ادري شنو وضعه..اعتقد بشت

حمّود راعي السيكل يقول...

من صج عندك صاحب مخملي والا هي أحلام يقظة؟

المخاملة (يعني جمع مخمليين بس ملوت الاردن, نفس طقة العلاونة والخصاونة والدهاشنة, لا لا الاخيرة هذي مالت الصعايدة يابوي) ما يرافجون عيال الفقارى


P:

nEo يقول...

لا حدك عاد الفواجرا زينة

مو الشيم اكل الحشيم ؟

mtfa2el يقول...

لو يفتح ساكت عجيب بالراية و يخلي الجباتية بنص دينار جان طق عصي عليه ..الله يعين المخمليين على حياتهم

Someday يقول...

اتهقى؟!! الا ابصم لك بالعشره!
الموضوع مو سالفه سد جوع و انا اخيتك! لااااااااا!!
يبون سالفه!! حدث جديد في مدار حياتهم!!
احلى و الذ و اطعم اكل, اكل الخيشين الي زي حلاتنا! احنى اهل المذاق و الاجر على الله!!

kila ma6goog يقول...

ذوق الخبز الحار بأنتركت و ادعيلي

شرقاوي يقول...

لا تغرك مطاعم المخمليين. لو تدخل المطبخ تشوف عجايب.

بس تدري؟ ما ودي أفصل أكثر، أخاف تلوع كبود قراء المدونة من المخمليين.
ـــــ
سؤال: هذي الصفرة المعلقة شنهي؟ شملة؟ أو فميص كشخة العشي؟

مطعم باكه يقول...

هذي هواية بالكويت ..

مثل ما اكو محترفين كرة ..

اكو محترفين مطاعم .. يمزجون بالأكل .. :)

راعي تنكر يقول...

اهم شي الدشداشة الشد
لوووول
يبا المخمليين طايفتهم وايد اشياء
الله يرحمهم برحمته

ARTFUL يقول...

ههههههه

ساكت عجيب ما اتوقع بس شباب المبارك يمكن

الله يغربل ابليسك

=)

حمودي يقول...

السوشي عديل الروح
بس مو سوشي ما ماكي لانه ولا ببيزه

بومريوم يقول...

ابو لطيف
و الله انا شكيت بس حسافة طلعت غير

يعقوبوو
حتى لو مطعم الاستراحة؟

كويتية
الفوتشينى شنو بعد؟
طافت على

ملاحظة
ما يبيلة بعد...ثلاث ملايين يملط الشنب
اعرف واحد كان شنبة يوقف بعير..
بعد المليون الثالث شواربه اللحين جنة مكوة ياهل

حمود
لا اتغشمر..هذول شخصيات بمخى اتكلم معاهم و اشوفهم

neo
لا عاد
تقارن الشيم بالفواجرا؟؟؟!

متفائل
و نسمية جباتوا..

someday
to see and be seen:)

مطقوق
اروح مخبز امير الامراء ارخص و انا اخوك:)

شرقاوى
فصل فصل
المدونة ما يدشها المخمليين لانها مو ستايل

و الاصفر المعلق هذا وزار المناسبات الرسمية

مطعم باكة
الا ما عندهم ذوق

راعي تنكر
لا تقول لى ما عندك دشداشة شد؟؟؟
اغير نظرتي لك

artful
ابليسك انت:)

حمودي
انا اقول اكل عيش ملفوف برويد ارخص:)

ARTFUL يقول...

قرب رمضان يا بومريوم

شهر الخير والتشريب

(=

esetch يقول...

بومريوم عيل ما جربت
المطعم إللي بدون إسم بالمباركية سكة محلات التمر

خبز رقاق حار مع جبن كلاسات

وإذا بتبدع وما بتزور أحد عقب السوق جرب المهياوة الأشكنانية وياه

eShamiYa_RockS يقول...

يعني ماكوأمل بوجبة "بومريوم" ب Maki ؟

Shaden يقول...

شنو يعني مخمليين
اذا قصدكم
ذوو الدماء الزرقاء
ترا ما ارضا
ريلي منهم

كويــتي لايــعه كبــده يقول...

اتعب على الشد!
:)

والانتركوت بطيت الاهل بط على سالفة ماكو الا صنف واحد!
ومقارنته بالمطعم الهندي جازتلي على الآخر
اتوقع انك تؤيدني ان المطعم الهندي أكلة عجيب
على الأقل يخيرك شنو تبي

Zaydoun يقول...

خيشي ويتكلم فرنسي أحسن من كل المخمليين... العب غيرها يا بومريوم