السبت، مايو 05، 2007

هذيان محموم فى كوخ ثلجى

نشكر كل من سأل عنا أو أرسل رودا أو كرت بعد الوعكة الصحية التى المت بنا
ليش دوم يكتبون جذى بصفحات المجتمع؟ و تلقى آخر شى محد سأل عنة الا الخباز اللى يم بيتهم..
انا محد سأل عنى الا ليان اللبنانية...
أسبوع طريح الفراش
..لا آكل الا الماش
..كم كنت أشتهى الاش
و دوم أتحلم بالكاش...
أخيرا صحوت على صوت الخياش
و لم تكن الا هذيان محموم بكاش
وايد فينى بوستات...
أول شى موضوع الالين اللى معترض على حفلات استقبال الولادة...
ليش الرياييل كلهم متعومسين؟
جرب تحط رقية بطنك تسع أشهر بعدين تطلعها من سرك
و مستخسرين بالحريم هالوناسه و هل جم فلس؟
و تحلطم بكل مكان خسرتنا و خسرتنا..استقبال و كاكاو
كفاية مجابل الياهل باليل..
أحلى شى ..لما الريال يسال مرتة بعد الولادة ليش نفسيتك تعبانة؟
صج؟ قول و الله
------------------------------------
شى ثانى
ليش الكتاب الصحفيين بدوا يسوون مدونات؟
مو كفاية عواميدكم الصحفية..مناشبينا حتى هنى
----------------------------------
الخبر من الوطن و القبس
تمكن أربعة شباب كويتيون لم تتجاوز اعمارهم الثامنة عشرة وخلال اربعة اشهر
من تحقيق انجاز ربما تنفق عليه كبريات المصانع اشهرا اطول واموالا باهظة،
بعد ان تمكن هؤلاء من تجميع سيارة امريكية فارهة
واخراجها بشكل وتقنية تنافس ان لم تتفوق على مخرجات المصنع الاساسي لهذه السيارة في بلد المنشأ
، في ضوء الامكانات المتواضعة لهؤلاء الشباب.
ويعرب هؤلاء الشباب عن تقديرهم وامتنانهم للدور الاساسي للرعاة الرئيسيين لهذا المشروع وهم شركة بيت الاستثمار العالمي «غلوبل» وشركة ايفاد القابضة وكراج اوتو تك سليوشينز، الذين اودعوا ثقتهم الكاملة في هؤلاء الشباب وفي قدراتهم ومغامرتهم المحسوبة بدقة.
مساكين طلبة الحكومة..محد يرعاهم غير جمعية المنطقة, لا و مو بفلوس بعد
كوبونات شراء من الجمعية.
غلوبل صار أمكانيات محدودة؟:)
جمعية المنطقة شنو تطلع؟ أكيد أمكانيات سردابيه مخشوشة
----------------------------
كان هذا الموجز...التفاصيل فى نشرة أخبار التاسعة

هناك 25 تعليقًا:

KQ8 يقول...

بومريوم..الف لا باس عليك

وبعدين شدرانا عن الوعكة الصحية التي المت بك

انت وليل إتغازلون بالتلفون ليل نهار

ياخذ اخبارك وتاخذ اخباره

الشرهه عليه اهو اللي ماحط تنويه ان فيك وعكة

ليل بتشره عليك امون لا وما امون

ومأجور انشاء الله

LiL ALiEN يقول...

حمدلله على السلامه .. اجر وعافية ان شاء الله


ايهو الاحسن .. 300 او 400 دينار تقطهم على استقبال يوم واحد وتسويه حق اللي يسوى واللي مايسوى .. او بهالمبلغ تشتري شي حلو حق زوجتك هدية .. ويظل لها مدى الحياة؟

LiL ALiEN يقول...

Krakatoa
منو قالك اني اعرفه؟

ما اتعرف على خيشيين

Diver يقول...

سلامات

و الله مادرينا يابومريوم بس هم الحق علينا
المهم ان شاء الله انت بخير الحين و لا تحرمنا من هلبوستات الحوة و تشريفنا بتعليقاتك اذا مريت علينا

اما بالنسبة حق مواضيعك في هلبوست تبي الصج انا اول شي وافقت الين بس بعد الي انت كتبتا غيرت فكرتي مع التحفظ على فكرة البذخ الي ماله داعي

اما عن الصحفيين قالو محد يقرالنا هناك خندور حظنا بالمدونات

و اخيرا الله يسلمك هذه امكانيات متواتضعة للمخمليين لا تحطنا مكانهم الامكانيات تفرق

KQ8 يقول...

ليل ماتنخش الاخبار
==
بومريوم

سؤال..ترى فيه حريم مايكلفون على ريايلهم شي..ومقتنعين ان هالموضوع كله فسق بفسق..وفشخره على الطل

الرك على المره

لمياء الحالمة يقول...

سلامات وماتشوف شر, أجر وعافية

nEo يقول...

سلامات يالغالي




بعدين غلوبل لما ترعى طلاب ثانويات خاصة مسوين سيارة



لما يروحون الثانويات الحكومية شنو مشاريع الطلاب ؟

رعاية سمرة ؟
ولا دورة تعلم الايقاع العدني ؟

ولا دورة شدني قلب ؟



:\

ناصر الكويت يقول...

لو خيشي مايفكر صوبك المرض

بس فقير

شرقاوي يقول...

خطاك السو. و ما تشوف شر يالحبيب...

نصيحتي؛ إترك عنك البـَنـَك، و بداله حط بمخباتك كل يوم ربع كيلة عنتشكك، لا أزود و لا أنقص.

وإذا كنت تدخن حاول أن تغير إلى نوع أخف على الصدر.

آنا من خوفني الطبيب بطلت عن زكاير اللف. خليت قوطي التتن و الكاغد بالبيت، و حولت على الروثمان.

وعساك بالصحة و السلامة...

Q80-ChillGirl يقول...

بو مريوم بعد جبدي انت و العيال و ام العيال "احب العايله كلها" برّدت جبدي بالرجاااااال

و فصلت من الظحك على

"أحلى شى ..لما الريال يسال مرتة بعد الولادة ليش نفسيتك تعبانة؟صج؟ قول و الله"

فظيييييييييييع

ظحكتني من قلبي

لانه صج و الله انانيين شنو هذا ياخي عليها بالعافيه خلها تستانس شوي على الاقل اتطيب خاطرها بهالسوالف و على قد لحافك مد رجولك مو لازم اينام الطفل بسرير من ذهب!! عادي اكو خشب

الصحفيين،، نفس سؤالي؟ ليش؟

هل التدوين مساحه و انتشار اكبر لانها عبر النت و غير مشفره؟ نعمممم
علشان جذيه مناشبينا اهنيه


وعلى الشباب المبدع والرعاة،، اهم شي كبريات المصانع؟ كبرى المصانع بدليه يعني؟؟

و الحمد لله على السلامه ماتشوف شر وسلامتك

Mohammad Al-Yousifi يقول...

ماتشوف شر

اكو اشاعة بأن مرضك متصل بشكل رئيسي مع ازالة تجاوزات الضاحية و خصوصا البيت اللي مسوي حمام سباحة على ارتداد املاك الدولة

و ناقل الكفر ليس بكافر

moodless يقول...

حمدلله عالسلامة وما تشوف شر انشاله،،

غلوبل و ايفاد القابضة،، كلمة القابضة تجيب الحارج مادري ليش!

اجر وعافية يا بو مريوم

KQ8 يقول...

بومريوم ماحط الخبر كامل


هالشباب مخمليين من قواعهم عوائلهم الكريمه تشير الى ذلك بلاضافة الى كونهم بمدارس خاصة ومسوينها مشروع تخرج..

الحلو في الخبر انهم ياحبة عيني يبون دعم..وماخذينه من الشركات المذكوره" كلش مو تبع الاهل والمعارف"ويقولون انهم اذا توهقوا..اضطرو يطلبون القطع من النت..ياعيني عطوني ناس في عمرهم..من عوائل خيشية مستعدة تقط هالكم من البيزات علشان مشروع تخرج..

طائر بلا وطن يقول...

أجر و عافية ما تشوف شر يا بو بريوم

:)

بس الآش مفيد للبلاعيم و امتصاص الحرارة

و يدخلك بغيبوبة و ينسيك المرض

:p

Warda يقول...

حمدالله على السلامه بومريوم
اجر و عافيه انشاءالله

I hope you are feeling better now

:)

متفرغ يقول...

ما تشوف شر :)

أبو إسحق يقول...

سلامات و ما تشوف شر

iDip يقول...

الحمدلله على سلامتك يا حبيب الكل
:)

العذر والسموحة
الظاهر المخمليين عادوني وما قمت احس بالشعب الخيشي

بس ترى حلومك غير الناس
تمرض

q80_demon يقول...

Get well soon. Did you consult that BS charlatan al-Nahham about your dream? If so, then it was probably something you caught from that culture dish of parasites :-o

expired يقول...

شى ثانىليش الكتاب الصحفيين بدوا يسوون مدونات؟مو كفاية عواميدكم الصحفية..مناشبينا حتى هنى --------

كلامك جميل جدا ، توني ادري ان النت مالك انت وربعك

وتقول انك طبقة خيشية
الله يعين لو طبقة ماسية والا ازقرتية
والا ازقمبية جان اسويت

AseeL يقول...
أزال المؤلف هذا التعليق.
AseeL يقول...

كلامك عن الحريم.. عجبني بس خالي من الفكر الاقتصادي المصري الهوية اللي يحمله فكر ليل الين في تعليقه

اما كلامك عن الصحفيين.. ترى فيهم من دش النت قبل لا المدونين يدشونه والنت ملكية عامة

أقول بومريوم انت ليش زعلان روح ناشب الصحفيين في جرايدهم ومجلاتهم عشان تصير فك الفك :)

وسلامات

بومريوم يقول...

karakota
الشر ما يجييك:)
انا و اللين ما نغازل..
يا انا ادق ابى سلف يا اهو يدق..هم يبى سلف

lil
الله يسلمك
الزوجة عقب الولادة كيفها
ان شاء الله تاخذ الفلوس تسويهم مخده:)

diver
انا اللى أتشرف بمرورك
مشكور:)

karakota
النقطة اللى بوصلها ان المرة بعد الولادة لها الحرية..تسوى اللى يشعرها بالسعادة

لميا
الشر ما يجييك:)
شكرا

neo
انت نخملى و مضطهد الخيشيين
ترى مخومخنا نظيفة
بس حظ ما ميش

ناصر
لو مخملى جان دزونى برة
بس خيشى..لى بقوا يعالجونى برة يودونى الوفرة
مستشفى الحصن

شرقاوى
اكو ال> من الكاغد و التتن؟
و لا متعة لفها بالايد و لا بالعلبة...

بعدين روثمان وايد خفيف
جرب كريفن بو قطوة

chill
شكرا الشر ما يجييك

اقولك الرياييل متعومسيين


مطقوق
يوم قريت تعليقك بغيت ابجى

انا تارس طشت بالحوش حق اليهال..و تقولى حمام سباحة..و بالحديقة...و بالضاحية

انا راضى بوحدة منهم

العزيز مودليس
الشر ما يجييك..
مشكور
حارج كلة دولارات:)

karakota
وصلنى خبر انك مدير بشركة استثمارية كبيرة
يعنى مخملى..
صج؟
صج؟
صج؟؟؟

طائر
الله يسلمك
الاش علاج شافى للقولون

warda
thanks
كلة من اكل الالين البايت

متفرغ
الشر ما يجيك

بو اسحق
الله يسلمك

idip
الله يسلمك
حلمى يتنبا بواقع قريب...للشعب سعيد
و ستمتلاء الجيوب بدولارات حمراء

demon
apple new product
I-Naham
راح احط لك الصور قريبا

expired
ما ادرى ليش يوم قريت تعليقك تذكرت عبلة كامل بفلم خالتى فرنسا
ناقص بس تصفقين و تقولين ووو شووووووووبش يا أهل المدونات

aseel
النت ملكية عامة صح
و انا اعتراضى و النقطة اللى بوصلها كالتالى

ستار بكس يسوون قهوة زفت..بس عندهم الفلوس و الانتشار
هالفلوس و الانتشار ذبحت المحلات الصغيرة اللى تسوى قهوة صح

اللى مو عاجبنى بالموضوع ان الصحفيين عندهم الانتشار التقليدى..
و مدوناتهم مجرد صدى لما يكتبون بكل محاذيرة و تزلفاته...

هل فعلا نريد من المدونات ان تكون صدى لصحافتنا المحلية؟

بعدين ياريت احد يعبرنى و يخلينى أكتب بجريدة..
لو صفحة المجتمع هم راضى

AseeL يقول...

aseel:
الناس تعرف تميز القهوة الزينة من الزفت والزفت ما تدوم اييلها يوم وما تلاقي احد يشربها

وبعدين اكرر ليش انت زعلان خل كل واحد وتزلفاته بحاله
النت مفتوح للجميع
والصحافة عشان اكون واضحة مفتوحة لمن عنده واسطة والواسطة يا قلم مميز او اشياء اخرى!..دوّر لك وحدة من الثنتين راح تلاقي غير الوسيط و808080 يدقون عليك :p

ودمت مدون مجيد

غير معرف يقول...

الصحافه في الكويت علاقات وواسطه
يعني تعرف واحد يشتغل هناك...ترز ويهك كل يوم هناك
او اذا وحده كل يوم دق على مسؤول التحرير و بوكيه ورد هني و علبة ككاو من هناك خلاص وصلت

الجيد و الحقيقي من الكتاب نادر
و المشكله ان الكتاب اكثر من القراء
و من واحد يكتب في جريده يظن انه ما يشق له غبار

وين كاتب؟ اخاف بس في الواشنطن بوست بس؟