الجمعة، سبتمبر 07، 2007

pimp my mostaw6af



آخر مرة زرت الستوصف..لاحظت شى غريب
ابواب الغرف كلها بيضا..الا باب واحد لونة بنفسجي
و مو اى بنفسجى..لا بنفسجى غامج
قلت يمكن هذى غرفة العلاج بالطاقة-سوالف مني غريب

المهم ذاك اليوم ما قدرت أنام..طول الليل أفكر بسر الغرفة البنفسجية
ثاني يوم الصبح رحت المستوصف
أبي أكتشف السر

وصلت و لا باب الغرفة مفتوح
دشيت...و لا الطوف كلها بنفسجى...بغيت ارجع
اثاريها غرفة الكاتبات و اهم صابغينها بنفسجى..
نا قصها قنفة مخمل حمرا و ريش على البنكة و تكمل

زين صابغين الغرفة قلنا ميخالف..
الباب لييييييش صابغينا من برة؟
زين المراجعيين شنو ذنبهم؟

و الشىء بالشيىء يذكر
شنو حدود تعديل الغرف بالوزارات؟
يعنى ممكن الواحد يحط اكسسوارات بسيطة
بس تدش بعض الغرف بالوزارات كانك داش غرف نوم
ناقص بس سرير بونفرين و كنبل بو اسد

بعدين ليش لى رحت تسوى معاملة على الكاونتر
لازم تلقى وحدة ماسكة قلم بوريش؟
شنو السر؟

------------------------
الرجاء من الجميع المشاركة بتصويت التشريب لاهمية الموضوع
اليوم هو آخر يوم

شكراً

هناك 11 تعليقًا:

Q8DOLL يقول...

والله اخوي صاج
مره في ندونه تناولت نفس الموضووع
وذكرت سالفه ام مكتب بقري
اي بقري
يعني النقشه الابيض بأسود مالت البقر
وكانوا ثلاث مكاتب ل3 بنات
فتذكرت جبنة الثلاث بقرات
وسالفت الريش هذي عمايل ابو الريش جان تذكره
بعدين اعترف حاشتني نوبة قلم الريش وكان شرط القلم وريشه على لون ملابسي بعدين الله هداني وقمت امسك قلم بك لأنه الوحيد اللي احسه يخلي خطي مقبول ليش مادري

اي تذكرت في وحده ظريفه ورئيسة قسم
تدش مكتبها قاطه جم زوليه على شكل تايقر
وكوشيا تايقر
وكل شي تايقر
شغل جنقل
فآنا من ويومها اسميها الجنقليه مع اختلاف المعنى باللغه الانجليزيه واللغه الفارسيه
"ترى مالي شغل بالفرس ولا الروم"
وتم التصويت وشق الجيوب والولوله
عساك عالقوه اخوي

غير معرف يقول...

أوعدك أن هالغرفة البنفسجية راح تكون أحد محاور الأستجواب لوزير الصحة القادم
بس عشان لا يقولون أنه أستجواب طائفي

أما مسك الموظفة لقلم بو ريش فهو كناية عن رغبة داخلية مكبوته لامتلاك سيارة بورش والله أعلم

Bad-Ran يقول...

كنبل بو أسد

لوووووووووووووووووووول

Sowhat يقول...

ديرة كل من ايدو الو

على طاري قلم وردي بوريش على الأقل بمستوصف

انا لما رحت الوزارة اتفق معاهم على المعاش كتبتلي الأرقام بالوردي وكان القلم في ريش

وانا اقول بقلبي والله لو شنو كان اللون هم شوية

اتوقع البنات فيهم نقص دلع او شي\


وفطستني ضحك على سالفة كمبل بو اسد

ناصر الكويت يقول...

وين صاير المستوصف

خل نروح نصوره

EXzombie يقول...

دكتور ياكل بنك و هو يكشف على الناس، الثاني صابغ شعره بنفسجي، دكتور حاط ترجية......!!!؟

كاتبة تحط ستعش الف لون على الورقة مالتك، وحدة تحط كلونيا بالورقة، الناس صاعت يا بو مريوم، و التشريب اهو الحل، لازم نردهم للزمن القميل.....!!!؟

و لازم نشوفك اليوم

Q80-ChillGirl يقول...

الريش يحمل طاقة الطير

و يحسس اللي تكتب انها بخفة الطير

صحيح مو كل مستخدميه "من الاناث" من الوزن الثقيل و اللي ايتمنون يصيرون من الوزن الخفيف،، لكن غالبيتهم من الاوزان الثقيلة،، فلربما يعطيهم احساس انهم "كما الريشة" ؟؟

او انها تكون حالمة و رومانسية و تبي اتطييييييير بالهوا من خف مشاعرها ؟؟

Nooni يقول...

لول عاد تدري؟ في علم الالوان البنفسجي معروف عنه انه لون الملوك لكن يسبب الاكتئاب :)


قصه القلم بو ريش قصه
وكاله يقولون اتقول ان البنت النثيه اهيا الي قلمها بو ورده و لا ريش فبما انها نثيه و دلوعه و حليفه الباربيات فنصيبها من الزواج يكون اكبر

شايف فليم كلوليس؟ المراهقات بهالفليم ماسكين هالقلم :)

بومريوم تدري خليتني افطن على سالفه المصصمات الديكور الي يشتغلون بالوزاره الصبح و العصر يصممون بيوت تقى هالغرف الي اتقول عنها جزء من الماركتنج؟


يعيش تشريب البيض

LiL ALiEN يقول...

لاتلومهم

انت شايف الوان مستوصفاتنا؟ .. بس ناقص تغير البيبان بـحديد وتقدر تصور برزن بريك سيزن 4 فيه .. تقول داش سجن مو مستوصف .. المستوصف المفروض يكون شايني يفتح النفس مو كئيب ويقمتك على المرض اللي انت فيه .. ماتشوف مدارسنا ومستوصفاتنا اغلبها استخدمت كسجون اثناء الغزو؟ .. تقول احد يفهم ويحاول يغير من هالشكل الكئيب؟

يمكن الأخوات اللي خانهم الذوق شوي .. بس لو كان من الاول المستوصف مصبوغ عدل ما اتوقع احد راح يغير فيه


وبعدين تعال انت وين رايح؟ .. هذا اي مستوصف احد غرفه بنفسجيه .. والكاتبات قلم بوريشه .. واللي يوزعون الملفات لابسين جلد اسود وكور حمره بحلجهم؟

اخاف رايح الجليب

بومريوم يقول...

q8doll
هالسوالف كلها بمجمع الوزارات
اتوقع أكو محل بالمجمع يبيع هالسوالف
تخصص ريش و تايجر

bad-ran

عجبتك؟:)
ترى لى اللحين اتلحف فييية

sowhat
قلم وردي؟:)
اكيد بيعنونك بقسم الميزوى ثيربي

ناصر
أقولك مستوصفنا
أكيد شويخ السكنية

exzomie
فى تنسيق قوى مع القوى السياسية لحملة التشريب
راح تشوف زلازل بدور الانعقاد الياى
النواب كل واحد بدش معاه تاوة



chill
حالمة و رومانسية ببيتهم
مو بالوزارة
زين الرومانسيية شكو بالبنفسجيييييييييييي؟:(


Juddy
سؤال جد
انتوا شنو تشريبتكم؟
اكيد تشريبة أصيلة
ممكن نعرف مكوناتها؟

lil
لا مو الجليب
صار لى فترة ما زرت وكرك هناك؟
غيرت النوعية؟

Nooni يقول...

اي افا علييك
تشريبه بيض ماتعرفها؟!
تشريبه الا كارت ساعات فيها لحم غزال

اي معذور مو اصلي مهجن
:P