الأربعاء، سبتمبر 26، 2007

اللى ما عندوش..ما يلزموش

فى البوست قبل السابق
العزيز
انتر كيو ايت سأل عن الالوان اللى كنت راح استخدمها لو اعرضوا على اصمم شعار زين

اول شى ابى اقول رائى بشعار الشركة من وجهة نظر فنية
اولا الشعار اقل من عادي و ما يعكس هوية الشركة اول نشاطها
و الغلطة الكبرى برأى استخدام الدوائر بالطريقة هذى
فالمصممين عموما يتجنبون استخدام الاشكال الجاهزة او اللى موجودة بالبلرنامج
و الشكل الدائرى هذا موجود بالالستريتر,جاهز




براى انة يخلو من الابداع,فشركة بحجم الاتصالات المتنقلة لما تفكر بتغيير الشعار المفروض يكون شعار يخليك تقول واو

او على الاقل يكون فية لمسة مبدعة او يكعس نشاط الشركة

يقول البراك"بينما تشكّل الحركة الالتفافية للألوان هالة من النمو والتقدّم والتنوع "
ماهو الانطباع الاولى لما تشوف حركة التفافية؟:)

نمو؟

الغلطة الثانية براى هى استخدام التدرج اللونى,عادة الشركات الكبيرة تكتفى بلونين او ثلاث للشعار و تتجنب استخدام التدرج

و يجب ان يوصل الشعار نفس الرسالة عندما يكون بالابيض و الاسود..بس بمجرد ازالة الالوان يختفى الشعار

و هى نقطة ضعف كبيرة براى



الان
لو يعرض على البراك اصمم شعار:)
أكيد راح يكون صورة مخباة طالعة لى برة
و الشعار يكون
"اللى ما عندوش ما يلزموش":)

كل الشكر للعزيز انتركيوايت:)

هناك 18 تعليقًا:

White Wings يقول...

بعيداً عن كل النقاط "التكنيكال" الي ذكرتها وأنا ما فكرت فيها من قبل، الشعار عاجبني في بساطته، ودوائره توحي بالاستمرارية والانسيابية
حلوة مو؟

Zaydoun يقول...

كنت ناوي أنطر مدة شهر على الأقل قبل لا أعلق على زين وشعارها واعلاناتها، عشان بس أمخمخها واتعمق واتعود على التغيير

وراح أخش رأيي حق بوست جديد قريباً

Mohammad Al-Yousifi يقول...

الشعار جدا جدا مهم و تحليلك أعتقد انه في محله

يعني ما ابي أسفه راي جيش المدراء و الموظفين اللي بالشركة لكن صراحة الشعار و الاسم أقل من المتوقع

شكرا

Bad-Ran يقول...

شاللي حدهم على التغيير ؟؟

LiL ALiEN يقول...

درر درر

ماشاء الله على هالنظره الثاقبة .. ويلومون المخازن العموميه يوم عطوك الخيط والمخيط حق تصميم شعارهم

غير معرف يقول...

محترف كبير يابومريوم ، وعطوا الخباز خبزه لو اكل نصه ،،

enter-q8 يقول...

تسلم يا بو مريوم
كفيت و وفيت
و الصراحه و ما اخفيها حاليا انا كنت متعمد انك انت بالذات تقول رايك فنيا فيه
لأن و ما فيها نفاق او رياء
الكثير من المدونين
يعتبرونك ذو حس فني وانا اولهم وماهي مجاملة
وانت كذلك لا تستخدم التعقيد في التصميم بل البساطه
او السهل الممتنع فيها
اذا اردنا اكثر دقه
فا إنشاء الفكرة أصعب من التصميم
وكنت متعمد ان ارى اللون بالابيض و الاسود
او درجات Cymk
و كما قلت لا شيئ جديد
انا لو رئيت تعريفات الالوان او غيري
اسميه بداية النهاية
تحية لك يالغالي
لكن يبقى السؤال
هل لو فرضنا لو فرضنا
ان الالوان المستخدمة تمييز العالمية لهذه الشركة
تكفى يا بو مريوم
ترى و الله اللي دافن المواهب اللي موجوده بالديرة عدم الاقدام على الخطوة الاولى
توكلوا على الله و ابتدوا
اخوك
خالد

esetch يقول...

مسمى زين، فيه تميز وخبطة معلم مثل ما يقولون

كافي لما الواحد يقول آنه خطي "زين" تشوفون وياي وين الصيدة

أو مثل واحد يروح بيشتري خط يديد والبياع يقول له عندي خط وطنية وعندي خط زين، أكيد راح تاخذ الخط الـ"زين" ، عدل؟

أما بالنسبة للشعار، آنه أتفق وياك، ما يبيله كلام

vancouver يقول...

يبا انتو اشعرفكم

شوف يا طويل العمر

الشعار موووووستوحى
من

المجرة
نعم نعم المجررررررررررة
وتدرج الالوان يحااااااكي
تنوع الوان الطيف عبر اثير الفضااااء

و
زين
معناها
الزين عندنا والشين حواليييييييينا


انا اقول

شركة بحجم الاتصالات بخلت تكلف مصميين محترفين لعمل شعاااااااااار
عالمي مميز

وعجبي

Q80 Blogger يقول...

طاح الفاس بالراس خلاص

المشكله شعار الوطنيه قبل بايقينه من شركه ثانيه

وشكرا ام تي سي اول واحد كان هم يشابه شركه أخرى

يعني صج لا مصممين ولا شي

خبط ولزء على قولت اهل مصر

ملاحـظـة يقول...

الدوائر معطيتني احساس
دوخيني يا لمونه

غير معرف يقول...

والله الشعار زين بس كان الفروض يصير افضل من جذي وثاني شي خوش نقطه على اذا انطبع ون كلر

بومريوم يقول...

white wings
الشعار بسيط صح...
بس مو بسيط و مبدع

zaydoun
في بوست ثاني عن الحملة الاعلانية..

مطقوق
فى اشياء ينحط لها خبراء و محللين و ميزانيات ضخمة
بس ببساطة ما تنجح لان الناس ما يتقبلونها
مثل فلم ووتر ولد مال كيفن كوستنر


و نفس ما قلت الشعار و الاسم جدااقل من المتوقع
المفروض كشركة تتعامل بالتكنلوجيا و الاتصالات ان يعكس الشعار و الاسم اشياء معينة مثل
الاحترافية-جودة الخدمة-الثقة
صعب انك تربط بين مفهوم الجمال و منتج تكنلوجى يتعلق بالاتصالات
لانة ببساطة مافى رابط بينهم
فالخدمة اما ممتازة او سيئة

برة الموضوع
فى واحد قاعد يربط عصاعص بينى و بينك ترى:)

bad-rad
re branding to go international
لدخول اسواق جديدة

lil
دام انت صاحبى وين الله بيوفقنى
حدى اصمم شعار حق بقالة و لا مطعم فلافل

anon
مشكور

العزيز enter-q8
احرجتنى
و هذا من ذوقك

اعتقد ان الالوان كان ممكن تكون تمييز للشركة لو تم استخدامها بشكل افضل
سوليد كلرز

بعدين ودنا نبدى بس اللى مضيعنا التشتت و الاحباط
و لا تسألنى الاحباط من شنو
بعد 13 سنة من الشغل بهالمجال اقولك ان المسيطر على سوق الاعلان و التصاميم بالبلد هم مافيا
و اذا كنت كويتى و ما عندك علاقات قوية فراح تندفن
بس الحمد لله:)

esetch
كلمة زين ارتبط بمفهوم ماشي حالة:)
خصوصا اذا انقالت بنبرة معينة

ام التمن ما تبى شعار؟:)

vancouver
شركة بحجم الاتصالات المفروض تكلف شركة متخصصة للنقلة هذى

q8i_blogger
شعار الوطنية القديم ماخوذ من شعار النصر الرياضي
و اليديد ماني متكلم عنه لان الضرب بالميت حرام

ملاحظة
بالضبط:)
ضيااااااااع

Nooni يقول...

اي والله صاج
اشعرفهم بالشغل الاصييل الزين


عاد تري انا اول شي نقدته اللون يعني الكويت نتفه و الشوارع زحمه و الاعلانات اشكبرهم بالشارع و الاوادم اعصاب و فوق هذا امسوين الشعار سود و بنفسجي؟! الوان الاكتئاب!

لو انا اسوي الشعار fun
يخفف عن العرب ضيقتهم

غير معرف يقول...

يقول البراك"بينما تشكّل الحركة الالتفافية للألوان هالة من النمو والتقدّم والتنوع "
ماهو الانطباع الاولى لما تشوف حركة التفافية؟:)

نمو؟

براك الصبيح كبير موظفي زين تم تعيينه رئيسا لمجلس ادارة الخطوط الجوية الكويتية بسبب خبرته بالحركة الالتفافيه والتى ستدفع بالكويتيه الى المزيد من ........ النمو !

KQ8 يقول...

قوة بومريوم

اهو رد ..يتيم وبرجع لبياتي الرمضاني..لما يفرجها ربك


الشعار..مو جنه ايد مسويه هالحركه

بومريوم يقول...

juddy
أكيد اللى مصمم الشعار دراستة مو اصيلة

كركوتا
تقبل الله صيامك و قيامك

اهو جنة ايد...بس مسوية شي ثاني
اللهم اني صائم:)

moodart.net يقول...

check this

http://www.web-translations.co.uk/shared/images/clients/emerald.jpg