الأحد، نوفمبر 16، 2008

أريد حلاً

الباركنج او مسافط وزارة المالية و التجارة و العدل موجودة امام صالة التزلج
وهي المنطقة اللي يسفطون فيها صغار الموظفين -و ما اكثرهم- لان المسافط اللي بالسرداب المجمع كلها مأخوذة لكبار الموظفين – و ما اكثرهم – و لا يستوعب ادخال الكل فيه
خو لما بنوه ما كانوا يدرون الاجانب ان الدولة راح توظف نص الشعب فيه


الزبدة من فترة بسيطة تم تسوير ارض المسافط اللي جبال صالة التزلج الموظفين توقعوا الخير و قالوا اخيرا الحكومة الرشيدة استرشدت الى فكرة بناء باركنج دورين او ثلاث حتى يتحمل زحمة السياير
تم تسوير الارض و ترك مدخلين للسيارات حاليا تدخل من مدخل و تخرج من الاخر

امس و في ليلة ظلماء انحط اعلان كبير يقول "نأسف على الازعاج ، ارض شركة الاتصالات الوطنية ، مشروع بناء المقر الرئيسي الجديد لشركة الاتصالات الوطنية"
اوووووف الناس هذي و ين تروح و بعدين انا خبري انها ارض الحكومة و ان من قبل لا تتأسس شركة الاتصالات الوطنية - يعني قبل لا يصير عندها اصول- كانت الناس تسفط في هالبراحة



السؤال: هل الحكومة باعت الارض مؤخرا ؟
و ان فعلت هل وضعت تصور او خطة بديلة للناس و الموظفين
قاعد اتخيل اللي راح يصير: موظفين الدولة يايين دواماتهم الصبح الارض مسكرة ازمة مروريه بسبب تكدس السيارات اللي ما تدري و لم تنبهه عن موعد اغلاق الارض ثلاث ارباع الموظفين راح يعصبون و يردون بيوتهمو ربع راح يعتصم عند مبنى المجمع
و اكيد في جم واحد راح يروح المجلس
اشوف مشروع ازمة يديد

هناك 13 تعليقًا:

ولاّدة سابقاً ... رانيا السعد ...رانية المنيفي حسب الأوراق الرسمية يقول...

كلنا نريد موقف نركن فيه أمورنا الحياتية /السيادية لدى الدولة

ZooZ "3grbgr" يقول...

سفطوا ببرج جاسم
فيه مواقف بس مو مفت

اذا قلت بتصير رياضي وتتمشى لي الدوام
باجر بالصيف بتصير هرده

مالها حل
تخطيط ماميش

Mohammad Al-Yousifi يقول...

لا تخاف يا بو مريوم

الحكومة بتبني لكم مشروع قطارات حديثة يمركم بيوتكم و ينزلكم بمكاتبكم

ماكو شي يطوف عالحكومة

افا عليك

Zaydoun يقول...

صج لي قالوا... حارة كل مين ايدو الو

ARTFUL يقول...

والله صج .. هالأرض صارت ملك الوطنية؟؟!!!

عاد قبل والمساحة موجودة والزحمه ما تخلص منها!!

تصدق مريت ذاك اليوم والا اشوفها مسورهزز قلت شكلهم بيبنون باركينغ ادوار

قعدت افكر على ما يبنونه وين يوقفون الناس؟؟!! قلت الله يستر وربعني كل شي على الراحه!!

الحين افلسوا من غير نطره !!

جمبزه

الزين يقول...

يقولون لك كل موظفين مجمع الوزارات راح يداومون من البيت

بيوصلون لهم كونكشن مع المجمع
وتصير اجراءات المعاملات من بيوتكم

وانتوا مجابلين التي في
وقهوتج جبالك

او من فراشك

انت عاد ومودك
وهالخطة بيسوونها عشان يوفرون التعب عليكم
وزحمة الصبح

وعشان يطبقون سالفة الحكومة الإلكترونية

والله احنا متطورين

:)

Diver يقول...

يابو مريوم كلامك صحيح الارض ارض الدولة بس الحكومة الرشيدة كانت تمتلك 24% او26% من اسهم الشركة و هذا يعطي الشركة و اي شركة اخرى تمتلك فيها الحكومة النسبة المذكورةالحق بالطلب من الحكومة ارض تبني عليها المقر الرئيسي
علما بان هذه الارض تم تخصيصها للشركة قبل لا تشتريها الاتصال القطرية و اعتقد تدري كانت من له عشان جذي عطوه الارض الحلوة
هذا و للعلم

اما عن صغار الموظفين فهم كصغار المواطنين او خنقول فقراء المواطنين الي اهم عيال عم الجلب

و اهلا بك في الكويت

ابوالوليد يقول...

على وزن دواوين معلقة

أقترح مسافط معلقة

مايصير ماخطرت على بالك بومريوم !!


شكلنا بنمشي بالمقلوب إذا صار كل شي معلق :)

LiL ALiEN يقول...

ليش ماتركبون قواري؟

يعني اليابان ثلاثة ارباعها قواري .. انتوا احسن من اهل اليابان؟

أبو لطيف يقول...

يا اخي ليش يروحون بسياراتهم

خل السواق يقطونهم الدوام
ويرجعون لهم بعدين

ما في اي مشكلة ... لا تعقدون الامور

والله المستعان

JiBLa CiTY يقول...

مجمع الوزارات بكبره غلط يعني ردت على مصافط؟


:)

بومريوم يقول...

ولادة
انا ما ابى الا مسفط بالظل حق سيارتى
و اذا الحظ مبتسم لى موقف فى شارع فهد السالم

عقربقر
وينا وين الرياضة...انا لو يحصل لى اسفط سيارتى بالمكتب

مطقوق
يا ليت يسوون قطارات
تصدق انا لى 2005 و انا اروح الدوام بباص مواصلات
متعة

زيدون
و الله ما حصلنا حتى حارة

artful
يبونا ما ندام غصب
مع العلم ان الشعب الكويتى ملتزم حده

الزين
انا على العموم طالب نقل
كاشير بفرع الخضار بجمعيتنا

diver
جذى وضحت السالفة
بس ما لقوا مكان أحسن من هالتقلقص

ابو الوليد
و الله احنا صرنا مثل الذبايح عند القصاب
معلقين من ريولنا

lil
احنا احسن من اليابان
مو كفايه ان احنا كويتيين؟؟

ابو لطيف
و اللى مثل حالاتى؟


جبلة
ادرى و الله بس الوضع اللحين مأساة

forzaq8 يقول...

تم تخصيص الارض للوطنية مع الاشتراط انها تبني مواقف لمجمع الوزارات