الأربعاء، أغسطس 29، 2007

عنصري عنصرى بس أعيش



و اللى يرحم والديكم لحد يقولى عنصرية و تفرقة بين بنى البشر و حقوق انسان
السؤال هو
ليش ماكو مستشفى للكويتيين بس؟
أمس و انا اراجع أحدي المستشفيات التخصصية..و انا بالانتظار
اشوف أشياء غريبة
مصري معاه ورقة يبى يدش على الدكتور من غير رقم
قمت لو قبل لا يدش سالتة عندك رقم؟
لا بس انا عاوز أكلمة بس
تكلمووة روح كلمووة ببيتكم..الناس ناطرة و انت ياي تبى تدش بارده مبردة
طخ و انسحب بهدوء
شوى واحد ثاني نفس القصة
و الممرضات الهنود مافيا بروحهم...عناية ووجة بشوش حق الهندي
و الكويتى خطر يطقونة
هم اللى بدوا بالتمييز العنصرى مو احنا
بعدين أكو مستشفى للعسكريين بس..و مستشفى للعاملين بالقطاع النفطي بس يعنى تمييز بس عالخفيف
مانبى معاملة مميزة..مانبى نتميز عن باجى خلق الله..بس نبى شوية أحترام و تقدير

هناك 16 تعليقًا:

SpiKeY يقول...

umm you tell me Kuwaities dont do the same???

you want me to tell you how many time a kuwaiti thinks he has the right to jump a line???

we as a community we are racist...we will always degrade others..

bas maradna we will be degraded too..thanx to thoughts like those...

Krakatoa يقول...

بومريوم

ما تشوف شر..اول شي

ثاني شي

المشكله اللي اتكلم عنها واقع..وتحصل بكل مكان

تبي افيدك

ترى حتى الهنود اللي يشتغلون بالسفارة الهندية عندهم عنصرية يزفون الكويتي ويلعنون خيره الخيره...بس هم تبي الصج ما تلومهم حنا مو مقصرين معاهم بره السفارة

السالفة عنصرية من الصوبين من الجاليات ومنا

لمياء الحالمة يقول...

بومريوم, سلامات وماتشوف شر

سؤال وأرجو إنك تجيب عليه بصراحتك المعهودة

لو كان إللي بغى يتخطى الدور كويتي ومن نوعية إللي الكل يتجنب إنه يدخل معاه بنقاش أو حتى بتنبيه,خوفا من حدوث ما لا يحمد عقباه, إشلون كنت راح تتصرف معاه ؟

ملاحـظـة يقول...

بومريوم

حتى لو تحقق حلمك
مستشفى للكويتين فقط

ترى راح يكون ابو العنصري
يعني من نوع هذا ولدنا حطوه الاول على اجندة العمليات

هذا من القبيله اصرف له الادوية اللي يبيها

هذا من من طائفتنا عطوه صمام القلب الالماني مو التايواني

هذا ملتحي يعني دين يعني منا و فينا
دخله غرفة الاشعة قبل ذاك اللي لابس جينز


مااااااااااااااا تترقع

بومريوم يقول...

spikey

My point is not only the turn but the kind of health care ppl getting just because they know the Dr

karakota
الشر ما اييك
العنصرية قد نتقبلها احيانا
بس فى مواقف لا يمكن السكوت عليها
العناية الصحية يجب ان تعطي للجميع بغض النظر عن اى شى
بس لما توصل الى ان الطبيب يعتنى بالمريض اللى من نفس جنسيتة عناية أفضل
هذا شى يحر و يقهر

لمياء
الله يسلمك الشر ما اييك

اجاوب عبى سؤالك
انا من طبعى ما اعصب.
حتي لو احد خذى دورى..مو مهم
يعنى لو الموقف صاير بمكان آخر..وزارة مثلا..جمعية
و احد تخطي دورى..بغض النظر عن جنسيتة او وضعه ممكن اسكت..اطوفها

بس ان يأخذ أحد عناية صحية لمجرد انة من نفس جنسية الطبيب او كويتى عنده واسطة
أعتقد انى راح اسوى نفس الشى بغض النظر عن منو يكون هذا الشخص
كويتى او غير كويتى-اذا كان معضل ممكن يكون هناك استثناء-

ملاحظه
و الله كلامك عدل
آخرتها بنصفى على مستوصف بكل فريج
و هم بيكون فى تفرقة

kila ma6goog يقول...

سلامات

انا شخصيا اتبع خطة في زيارة المستشفيات الحكومية

ما اروح قبل الساعة وحدة بالليل أو ثنتين

يكون المكان فاضي ماكو الا انا و خمسة غيري

اما اذا شي مستعجل فالخاص افضل

chikapappi يقول...

Well, yeah its from both sides - i've been at hospitals o am in a shitty conditions & I wasn't admitted because I am not a priority- I also work in a company infested by Indians o palenstinians o they do have mafia bas we arabs give them hard times - systme is the problem not the people and what happens outside the hospitals makes people act the way they do...

LiL ALiEN يقول...

سلامات وماتشوف شر .. والحمدلله انك طلعت علشان لاتثقـّل علينا وندزلك بوكية ورد


عزيزي .. عندي اختلاف بسيط معك على التسميه .. فالموضوع اللي ذكرته يسمى "قلة ادب وذوق" وليش عنصرية .. اذا انت واقف بالدور وواحد يايلك مادري من وين وخطـّر المتواجدين فهذا جليل حيا .. وهذا النوع لازم تحرجه جدام الناس مثل ماتفضلت لأن ماينفع معاه الا جذي

بس اسمع هالسالفه اللي صارت جدامي ومثال على العنصرية .. واقف بدور الصيدلية بأحد المستشفيات .. جدامي كويتي كبير بالسن ليمن وصل دوره قاعد يكلم الصيدلاني وهم الصيدلاني كويتي .. رد الصيدلاني على الشايب .. حجي ارجع حق الدكتور وقوله خل يغيرلك الدوا ويعطيك البديل له .. سأل الشايب انزين ليش ؟؟ انا شايف الدوا عندكم .. قال الصيدلاني .. اي حجي بس هذا الدوا مخصص من قبل وزارة الصحه "يصرف للكويتيين فقط" .. رد عليه الشايب .. انزين يبا شوفلي عندكم دوا حق "جلاب" (حشاكم)؟ .. اهني انصفق ويه الصيدلاني وعطاه الدوا

الصيدلاني قال لي ياخي والله توهقت .. قرارات مادري من وين يايبينها واحنا ناكلها مع المراجعين .. سألته شسالفه؟ .. قال الحجي بدون .. والمسكين ماكلها بقرار الوزاره


السؤال يابومريوم
ليش هالنوع من العنصريه؟ .. المرض مايعرف غني ولا فقير .. يطق الكل .. ليش وزارتنا تفضل ناس على ناس؟ ليش اللعب بأرواح الناس؟

حسام بن ضرار يقول...

تطوّف الدور حتى عند الكويتيين موجود

كم مره يدشون دعوم ... و المشكله اللي الدور لهم يتنازلون

فالظاهر الغُرب قاموا يقلدونهم من باب من عاشر قوماً اربعين يوماً و هيبة الكويتي صارت ضايعه هالزمن

bo_sale7 يقول...

انا معاك بومريوم
الموضوع مافيه تفرقة .... روح اي دولة بالعالم تلقى في نظام لكل جماعة او مهنة ...مصر مثلا انت ككويتي ما تقدر تراجع القصر العيني ... واذا بتروح الخاص سعرك غير باجي الناس

المانيا وامريكا نفس الشي يا السعر غير او المستشفى يتبع جهة تامين معينة
الموضوع بالكويت لازم يكون في مستشفى للوافدين ونرتاح من زحمتهم ومراجعتهم اللي بدون سبب
يعني لو تلاحظ بعد تطبيق قرار رسوم الدينارين على علاج الوافد بالمستوصفات انخفض عددهم لانه ما يراجع الا صج محتاج ....

ناس وايد اييبون اهاليهم التحاق بعائل او كرت زيارة ويعالجونهم ولا يسوون عمليات وياخذون احسن دوا والدولة مو مستفيدة من وراهم شي علشان جذيه قرار صرف الادوية الغالية للكويتي فقط قرار سليم بو مريوم ..
انا معاك على طول الخط

غير معرف يقول...

أسوة بما هو مطبق في الدول المتحضرة فأن تطبيق نظام التأمين الصحي سوف يساهم في حل هذه المشكلة . بس بوجود مثل هذه الحكومة الأصلاحية وهذا المجلس الخايب الرجا فلا يبدوا أن هناك أي ضوء في نهاية النفق

ناصر الكويت يقول...

على فكرة المستشفيات الحكومية بمصر

ما تستقبل الخليجي بشكل عام

ومع هذا ما اعتبرناها عنصرية من قبلهم

Tekana يقول...

صاج والله يابو مريوم
هالسسترات المصاروة والهنود دايما يبدون ربعهم واحنا ناكلها..صراحة السسترات الكويتيات ماشوف منهم جذي

الله يبعد عنكم المرض انشالله

Q8DOLL يقول...

الحين خل يسنعون المستشفيات اللي موجوده عشان يسوون للكويتيين مستشفى
من زين مستشفياتهم عشان نطالب بوحده لنا بروحنا
الخاص احسن

بعدين بشوف عيني خصوصا الحريم ادرعم وتناديها ولا تعبرك بعد
كويتيه تتصيمخ
بعد شتسوي معاها !!
موسالفت هنود والا غيره
يبا الله كريم

Sowhat يقول...

ولو وقفت بلاين وكلهم اجانب وكان شرطي و لا بالجوازات راح يقولك الأخو كويتي ؟ ليش ناطر! تعال يبا خل نخلصك

العنصرية موجودة والحل مو فيها الحل بالكلمة السحرية " النظام"

في البوست الي فات مارديت علي مادري سقطت سهوا و لا عمدا :)

بومريوم يقول...

مطقوق
الله يسلمك
آخر مرة زرت المستشفى بالليل اشكو من رضة
الدكتور طحن بندول مع ماى و دهن أيدى
بعدها حرمت اروح الطوارى

chikapappi
مستشفي الكويتيين هو الحل


ليل
يا ابو الذوق انت:)
ات مرتاح..اذا تعبت تروح مستشفى الابحاث
بعدين مكن يقول المرض ما يفرق؟
شوف أمراض المخمليين و امراض الفقارا

حسام
اذا ضباطنا ينطقون بالشوارع
خلها على الله

بوصالح
و الله كلامك على راسي
انا مو باط جبدى الا اللى يدشون كرت زيارة عشان يتعالجون
عاد من زين مستشفياتنا اللى يايين تتعالجون فيها

ناصر
شدراك؟
يقولون انك مصور برنامج بمصر صج؟

tekana
الله يسلمك

q8doll
تتصيمخ و اذا احد كلمها خزتة
زيد احترمي الدور و الارقام

sowhat
أعتذر منك
أكيد سقط سهوا
السسموحة