الأحد، يناير 21، 2007

i sold my soul to zee devil




أمس انا و أحد الاصدقاء الخيشيين نسولف عن القروض و عن ارتفاع الاسعار و مشكلة انتشار السوشى بالكويت

الصديق قال لى شى يخرع صراحة.

يقول انة راح ياخذ قرض من البنك عشان يكمل بنيان بيتة بأم الهيمان, المهم قبل لا يوقع العقد,قراة

أنصدم من وجود هالشرطين:


طبعا هو صورهم زيادة بالتأكيد

انا ما صدقتة طبعا,بس اهو حلف و خذانى اليوم الى فرع البنك الرئيسى بالديرة

شى مو معقول, بالسرداب أكو كم غرفة, حاطين فيها اليهال اللى ابهاتهم امتنعوا عن التسديد

و اليهال معروضين للبيع

و يقولون ان المخمليين هابين بهالموضة

يشترون عيال الخيشيين و يشغلونهم خدم

---------------------------------------

سؤال للمخمليين

ليش ما نشوف مطاعم مندى بالديرة؟

ليش المندى لا واى كلش مو ستايل و السوشى الله وايد لزيز؟

مع ان الاثنين مثل مثل

الاثنين لازم ينوكلون على الارض

الاثنين ينطلقون ن تقاليد عريقة

الاثنين يبيلهم طباخ أجنبى

عقب السوشى لازم تشرب ساكى و عقب المندى لازم لبن..الاثنين نفس المفعول


هناك 10 تعليقات:

Diver يقول...

السيد القائد مع العلم باهمية الموضوع الذي نشرته اليوم الا اننا في الحركة الشعبية الديمقراطية العظمى لتحرير الكويت من السوشي نود ان نعلم انطباعاتكم على الهجوم الجبان الذي تعرض له احد افراد عائلة المناضل ليل الين بعملية الخطف

بومريوم يقول...

diver
انا مو قائد...انا واحد من الشعب
قائدنا هو ضميرنا

Mohammad Al-Yousifi يقول...

أعتقد ان سبب ندرة مطاعم المندي مقارنة بكثرة مطاعم الشوشي تعود الى نوعية الوجوه المتواجدة في هذه المطاعم

مطعم المندي من بتجابل فيه؟ خميس و شبيب و راشد و عبد الحي؟

بينما مطعم السوشي تجابل فيه هيفاء و ريما و جنا و نوف

:(

LiL ALiEN يقول...

اتفق مع كله مطقوق
وبعدين شعرف المخمليين باكل "التيس"؟

تصدقون ودي اشوف مطعم باجه .. بنات متيمعين فيه مثل فرايديز وتشلييز بطاوله وحده .. وطايحيله لسانات وكراعين

error يقول...

heh.

لان السوشي مو ذبح اسلامي

Amal يقول...

بو مريوم,,

دام عرفت الساكي ,,
فأنت على قولة نيلة مخملي متنكر في زي خيشي!!!!

:)

White Wings يقول...

والله كلكم ما عندكم سالفة، ماكو على المكرونة بالبشمل
عندي سؤال محرج، يعني شنو مندي؟؟

غير معرف يقول...

وايت وينغز
بنت مطلع الشمس؟

بومريوم يقول...

مطقوق صج مطاعم السوشى فيها هالسوالف؟؟
جنى بارتد

الين
نقبل عزيمتهم على السوشى اذا قبلوا دعوتنا على مطعم مندى الرياض بالمنقف

error
المخمليين وينهم وين الذبح


amal
الساكى نوع من أنواع السانكست

white wings
واى وااى
ما تعرفين المندى؟
شنو هالرقة

neelaah يقول...

بو مريوم
على فكره فتحوا مطاعم سوشي في فحاحيل
هذا دليل على انه السوشي مو حكر على بني مخمل اللي انت اكيد منهم بس تخاف من العين
بل هي اكله شعبيه
مثل ما الفول اكله شعبيه في مصر
و المجبوس اكله شعبيه بالكويت
و الكبسه في السعوديه
السوشي في اليابان

انت ليش مو راضي تعترف انك أخطات لما قررت انك تقول انه السوشي مخملي

بس لو تقول هالجمله الحرب تنتهي
يالله يبه نبي نشوف اشغالنا
و نرجع حق بوستاتنا العامه

خلصنا و اعترف