الأحد، سبتمبر 07، 2008

بوق عيني عينك

لانى ما استغنى عن الفضائى الصغير...
و لانة صاحب اخف طينة بين المدونين..لزمت عليه يكتب برمضان..
و هذا أول بوست رمضانى
------------------------------
"بقلم: ليتل اللين"
بطولة: ليتل ايلين في دور مهند



مغامرة في احدى الجمعيات التعاونية
مهند قاعد يحاسب .. وطلع الحساب و خرده .. مهند يطلع العشرين دينار العزيزه .. والمحاسب يرجـّع الباقي مع علك

مهند: حبيبي الناس صيام .. ما أبي العلك
المحساب: هذا الباقي

مهند: سبحان الله .. ومن متى قمنا نحاسب بفلوس والباقي ترجعونه لنا علك؟

المحاسب: والله مفيش خرده

مهند: جمعيه بكبرها مافيها خمسين فلس؟ .. وانا شنو ذنبي وشنو ذنب غيري اذا انتوا ماعندكم خرده؟

المحاسب: مفيش يعني اعمل إي؟

مهند: خلاص عطني 100 فلس

المحاسب: لي؟ عندك 50 فلس؟

مهند: لاماعندي .. بس اذا ماعندك 50 فلس عطني 100 فلس

المحاسب: إزاي؟ .. لأ

مهند: ليش مايصير ترد لي 100 اذا ماعندك 50 .. بس عطيتني علك بدال الباقي .. منو سمح لك انك تسوي جذي؟

المحاسب: خلاص باأه .. سماحنا فيهم

مهند (قفل وركب راسه ابليس): لا يبا مو مسموح .. ابي خمسينتي .. قوم هز طولك ودورلي 50 فلس من اي جهنم عندكم


طبعا مع الشد والمناجر .. يالنا مسؤول الجمعيه .. وبعد ماسمع اللي صار .. طالعني بنظره


المسؤول: كل هذا على 50 فلس

مهند: اي شغل الحرامية والجمبزه مو على راسي .. قاعدين توزعون علك علينا بدال الباجي؟


التفت على الكاشير ولا جدام كل محاسب فيهم .. قوطي علك


مهند: كفو والله .. علب علك عند كل محاسب .. اشكره بوق بالناس

المسؤول: لوسمحت اخوي احترم نفسك ومايحتاي هالكلام

مهند: اللي يرحم والديكم .. طلعوا خمسينتي .. ولا ردوا كل فلوسي واخذوا اغراضكم

المسؤول: طلع لي ربع دينار من جيبه وعطاني ياه كنوع من الاستهزاء

مهند (بويه عريض): اخاف بستحي وانحرج يعني


اخذت الربع مشيت .. وآخر شي عطيته حق الهندي اللي دز العربانه

المقصد من هذا كله .. شنو هالحرمنه اللي قاعد تصير عيني عينك؟ .. منو سمح للتاجر ان يتخذ خطوه مثل هذي؟ .. وين حماية المستهلك؟


الحساب فلوس .. والباقي الحساب علك؟


50 مني .. 50 من غيري .. 50 على 50 .. وعليكم الحساب



هناك 28 تعليقًا:

ملاحـظـة يقول...

عاد الله يهديك
حرقة الاعصاب و انت صايم تسوى هالخمسين فلس ، جان خذيت العلج هم زين حق عقب الفطور يهضم

راح تقول لي مبدأ

اقولك على قولة العراقيين : يا مبدأ يا بطيخ انظر حولك :)

مكانك فاضي
و بعدين انت مو عندك مدونه
شحقة مزاحم الناس في مدوناتهم
ارجع مدونتك ناطرينك

Sowhat يقول...

لووول صج مزاج بس زين تسوي فيه

ماتلاحظ ان رقم 50 صار رمز بالكويتي كل شي خمسين ....

اشتقنالك يالغالي .. بومريوم قاعد بروحة يحوس اهني بلياك


 

الجوري يقول...

I agree with you wholeheartedly,
it's a value
,i'ts consumer rights
if we accept it we will encourage their theft
although if i were in ur shoes ,i would tell him to give the remaining money (when its available )to the porter

esetch يقول...

صارت للأخ إللي جدامي بالطابور نفس الشي

بس أخينا رضى بالعلج

mo3ath يقول...

زين ماتسوي والله

السالفه مبدأ وانا معاك بالي سويته

بروح الجمعية الحين وبسوي نفس الصيحه وخل نطلع فيها مظاهره لووووول :)

nanonano يقول...

that's soo true...good for you that u took the rube3 dinar

كويــتي لايــعه كبــده يقول...

هالسالفة صج!؟

واللي يرحم والديك أي جمعية؟

عيبنا على مصر وصرنا اخس منهم!

الله لا يحطني بهالموقف
بعض المواقف مو مال تمسك نفسك
مال تكود قوطي العلك على عريض الوجه المسؤول وساعتها أقول له ناد الشرطة انا ابي قضية
لي او علي مو مهم بس ابي أفضحكم

اذا كان رب البيت...

غير معرف يقول...

زين ما سويت

يستغلون احراج الناس حتى في الشهر الفضيل

هذيله شياطينهم ما تصفدت .. اهم بكبرهم شياطين

LiL ALiEN يقول...

السالفه صج 100%

واكيد في منكم من مر بهذا الموقف من قبل بدون مايلاحظ او شافه جدامه .. وعدم الاهتمام للموضوع لصغر حجم المبلغ

وصلني ايميل اليوم من شخص عزيز لمقاله وتبين ان في ناس غيري حاشهم هالشي بطريقه ثانيه

http://www.alqabas.com.kw/Article.aspx?id=422142&date=07092008

J Daily يقول...

محاسب الفرع إلأي يم بيتنا كل يوم متهاوش معاه على السالفه

وجم مره اروحله احس الاغراض غاليه تاليها اكتشفت ماله خلق يحسب
فـ مثلاُ بطاط شاك فيه 80 يطق 100
برد كي دي دي 100
وجذي
لما طلبت منه الفاتورة خاف وسويتله سالفه وماقام يعيدها
--
كويتي لايعة جبدة تقول نعيب عالمصريين

اي المحاسب مصري d-;

Loolykinns يقول...

لو انا جان عادي حنجت وقلت "لا ابي 50 مابي ربع ... ما آخذ شي زياده عن حقي"

تصير سمردحه لو صار هالحجي

أبو لطيف يقول...

50 فلس من 1000 زبون باليوم
50 دينار

بالشهر 1500 دينار علوج ( جمع علك مو علوج الصحاف )

هذه جمعية وحده بس

وبعد جم شهر

تصير 100 بدال الخمسين

واذا الناس سكتوا

تشتري شي بدينار وتعطيه 20 يرجع لك اغراض بـ 19 دينار

تلقى الكاشير حاط اكياس يمه متروسة علوج وكاكاو وبطاط
كيس بو خمسه وكيس بوعشرة... وانت رايح

ونتحول الى نظام المقايضة


تدري شتسوي في الكاشير

اخذ علج بو خمسين بقيمة دينار

وادخل الجمعية اشتر لك شي بدينار ولما تحاسب عطه العلوج

ضـاد يقول...

معقول جداً وايد


وبالمناسبه! شنو سالفة الخرده بمحطات البانزين؟؟ ليش يردون الانواط ويسوون روحهم بيروحون يجيبون خرده ( حدايد ) من قلعة وادرين !؟؟؟


يعني مايصير يحطون الخرده مع الانواط بمخابيهم!!



:)

ناصر الكويت يقول...

ليل من عرفته وهو جعص ويموت عالفلس

وانت يابو مريوم ابد ماتحب الفلوس


الاستفتاء متى يخلص طال عمرك

بومريوم يقول...

هذى العملة اليدية علج بو طقة

ناصر الكويت
التصويت ينتهى 2011 ان الله احيانا

ARTFUL يقول...

أبي خمسينتي

كاااااااااك


الله يغربل ابليسه

Someday يقول...

يا زينك و الله
زين ما سويت!
لو كل واحد يوقف هالوقفه مع كل الاشياء الي قاعد تصير بهالديره جان احنا بخير!
و مانال اسمك يطلعلي كل ما احط الرادو على مارينا!! :"(
"lil" nagham ragam"!!

Diver يقول...

التاثير المصري في مبادئ المحاسبة الدولية

على فكرة شسالفة الي تغلون ويخلون مدوناتهم بالدعوات بس شالسالفة ترى من تغلى تخلى على قولة الكويتيين

mtfa2el يقول...

تصدق توني انتبه
أثاري سيارتي مترسة علوج من هالسالفة

eShamiYa_RockS يقول...

في نفس سياق موضوع النصب و الاحتيال

يقولون ال
service charge
بالمطاعم بدعة!


عفوا .. هذا من تأثير الاسلاميين
قصدي احتيال.. يخلونا ندفع معاشات الموظفين.. و لك الحق انك ما تدفع و تدق على رقم حماية المستهلك و تشتكي عليهم

هم أيضا سالفة مبدأ
و الله أعلم

مــشـعـاب يقول...

وانت ليش حارق روحك مو اخر شي راح يدق رقمك بالكمبيوتر و اخر شي اتزيد البيزات نهاية السنه الارباح بدال 90 دينار راح تاخذ 90 دينار وخمسين فلس يعني مافيها بوق :P

بس خوفق من اللي مايسالك عن الرقم ولما تعطيه الرقم اتحصله داق رقم ثاني لا والاسم طالع وتعرفه :P

هي تبدا تلعن خيره :P

مكان للعبث يقول...

ستعجبك اخر بوست
تفضل بزيارة مدونتي
وسأسعد لتعليقاتكم
http://makanabath.blogspot.com

Q80MINI يقول...

وطبعا لو تلاحظ ان كل الكاشيرية اللي موجودين يوزعون علج من نفس الماركة!
لأن شغل الجمعيات كله ماشي على العمولات
اعطيك عمولة بس ابي بضاعتي تمشي بسرعه

وهذا اللي قاعد يصير

وزين سويت فيهم

Q80-ChillGirl يقول...

loool

قبل رمضان تهاوشت على موضوع مشابه بس انا اكشخ، على ٤٠ فلس و طلعتهم من عينه، بس مو كاشير جمعية

و هالموقف ايتكرر بمحطات البانزين و كله كووووم و لما يرد لك الخمسين اللي بقت عشر و خمس فلوس و يسوي روحه يعدهم و كل شوي يعطيك نظره "الحبيب املزم؟؟" و يرد يعد، جود تهون عن ال٥٠ و ياخذها الفهلوي

المسألة مبدأ، انا اعطي من حلالي كيفي، اهو ما يقص علي ولا يبلفني لو بفلس حمر

mowa6en يقول...

اي اليوم 50 فلس ، باجر نص دينار ، الي عقبة عشر دنانير ولي الامية دينار .

أحييك على إحترامك للمال العام ، أشتم فيك رائحة وزير إصلاحي .. ممكن تقبل بالوزارة ؟

mowa6en يقول...

أول زيارة لي ، وعن جد عجبتني المدونية .
عادك الله على أمثاله

meo يقول...

انا يصير فيني نفس الشي بالهند
يقمتون مني 5 ربية ما يعطوني اياها ليش ما عندهم اتعب الصراحة

ترانســـجندر وأفتخــــــر ،، يقول...

صباح الخير
يعطيك العافيه على هالموضوع وعندي كومن طويل ياريت تتحملني فيه..
اول شي..
على رااااااسي والله على هالموضوع..
قد يكون موضوع قديم لكني كنت ابحث عن هالموضوع عند العم قوقل وطلع لي جم موضوع يبرد القلب من بينهم موضوعك
وفعلا بردت جبدي وقلبي ههههههه

وهذا كومنت من شخص زهقققق من البووووق لما اخر شي اعلنت الاضراااااب هههههه
وصرنت بوعباش على الكاشيرية وحيل طايح عليهم بوقه ورا الثانية..!!
مرة اشكره اصناف عامة زيادة عن الاغراض الي انا شاريها بالفاتوة يعني على سبيل المثال اغراضي 10 بالفاتوة 11 شي !!
وردولي فلوسييي الحمدالله وقطيت عليهم جم كلمة
ومرة يزيد سعر السلعة بالفاتورة اشكره واهيا عليها سعر انا ادري ارد البيت اشوف اللزقة شي والورقة زايده قول 50 فلس!!


واكثر بووووقاتهم بسبة كلمة الاصناف العامة هذي!!واذا سالت ليش يقولون مافيه اسم !!لاوالللله اخاف صج
وهالكلام مو صج لانه كل شي له اسم اللهم بعض الشغلات ساعات مالها اسم مثل التمر وغيره هذا مثال عليي صادفني من الشغلات الي مالها اسم بس قليل

ونصيحتي للي مايبي ينباق مايلي :
واحد مايشتري شي ماعليه سعر
اثنين لما يرد البيت يقارن بين الاسعار الي بالفاتوة والي محطوطة على كل سلعة
ثلاثة مهم جدا يقول للمحاسب لا تكتب اصناف عامة و اي شي اصناف عامة وماله اسم قولي عنه ..واذا قلت له جذي يمكن بس تلقى مكتوب اصناف عامة شغلة شغلتين..بس اذا ماقل يمكن تلاقيي الفاتورة كلها اصناف عامة لووووول اسال مجرررررررررررر
رابعا ويفضل وخصوصا للي عنده وقت يسمح له بهالشي انه اي شي يحطه بعربانته يحسبه بتلفونه شي شي يعني مايوصل للكاشير الا
هو عارف حسابه
واشوف وايد ناس قاموا يسونها
وهم الي يحس انه حسابه مو اوكيي يقول حق يستاذن من الي واقف وراه ويقوله اسمحلي انا شاك بالحساب فيه بوقه ويقول للكاشير حبيبي احس من يديد
ويصير لا احد يقول لكم مايصيييير


وتدري شنو مشكلتنا؟
انه نقول لا شكو معطيني فاتوة وشلون ببوق والخ ؟!!!!
شنو شلون ببوق؟ يبا هذول ناس دارسين تجارة وبعد ماتمشيي يردون يظبطون كل شيي بسرعة من يد ويديد


وانا وايد منبطه جبدي من هالموضوع وبكتب عن هالموضوع خلال هاليومين وبحط فيه الطرق الي كتبتها فوق الي من خلالها ممكن الواحد يتجنب انه يبوقونه
وبانهاية الي قاعد يبوقونه فلوس حرام وزقوم وياويلهم من الله ومو محللينهم


والسموحة ياخوك طولت بالكومنت عليك بس صجججججج انا متضايق من هالموضوع لانه اذبحوناااااااااا !!
يكفي السلع والاسعار نار بعد بوق فوقه مايصير !!

لك مني كل تحية وعليك فيهم :)
تقبل مروري ..
سالم