الثلاثاء، أبريل 29، 2008

money shout


القبس اثبتت أخيرا و بجدارة انها جريدة ملاك...تمشى على هواهم
لا ليبرالية و لا مصداقية..حالها حال باجى الجرايد ..اللى يدفع أكثر يتلمع أكثر
ف الله يخليكم لحد يطبل
ما سوتها حتى مع السعدون او الخطيب ان تحط كلامهم مانشيت بالصفحة الاولى
شخص قبل لا يدش المجلس يقارن نفسة بشهداء بيت القرين
لى دش المجلس شبيسوى؟
أكيد بنطلق علية هيثم الشايع رضى الله عنة
ودى أعرف كم نسبة الشايع بالقبس؟
لحد يعيب على الوطن انتوا صرتوا اردى منها
بعدين ليش قاعد تصفق؟..ما يذكركم بالروضة؟..تفا تيفى تات تى

شغلة ثانية...بوقة حدس اللى شقيتونا فيها..
الصقر رئيس مجلس ادارة كم شركة؟وهو نائب؟ و كم بنك؟
اووة نسيت...الصقر من اولياء الله الصالحين لا يجوز الاقتراب منة
اللى لة خلق..يروح يحط اسم الصقر بموقع وزارة التجارة بعدين يقارن النتايج بالمناقصات


تهقون لو انا ارشح نفسى القبس تحط لى مانشيت؟

هناك 23 تعليقًا:

esetch يقول...

بومريوم التعليق الول صار له خلل

على العموم

أكيد بيلمعونه مو ولدهم
يبه جرايدنا آنه غاسل غيدي منها من زمان

بس تصدق آنه عاجبني بالشايع إنه شاب. مع إنه خاب ظننا بمرزوق، قلنا شاب وراح يسوي ويسوي. يالله

بس تعال ترى آنه ما أسمح الإقتراب من الصقر
ترى معطي لواعيب نادي صليبيخات مكافأة، كل لاعب إبـ 100 دييييينار ما نبي تحرش فيه يمكن يتكرم ويزيدهم 20 دينار بعد

Bad-Ran يقول...

شفيك على المخمليين ؟!

Someday يقول...

أفا عليك بس!!!
أصيرلك جريده! بس على شرط!!!
اذا طالبت بعوده ليل!!

راعي تنكر يقول...

يبا اترك عنك القبس وغيره
كل واحد
كلو بالهوا سوا


بس تصريح التشريب عجييييب
loool

Mohammad Al-Yousifi يقول...

امس بوّهت بالقبس ربع ساعة مو مصدق

صفحة اولى!

شدعوة!

KQ8 يقول...

شنو مشكلتك..مع الصقر؟؟

يا رجل هذا رجل صاحب كرامات شالله ياسيدنا البحيري.

وبعدين..انت المفروض ما تنزل مانشيت بجريدة القبس..المفروض تروح جريدة الخضرة..عفوا جريدة الجريده..واخذلك بووز مع الناقة الاقرع

غير معرف يقول...

الاخ بومريوم الملقب بنصير التشريب
بعد التحيه, انا ضيف جديد و اتمنى القبول

للاسف انا ايضا انصدمت من المانشيت العريض و عدم الحياديه للقبس مع انها الجريده الوحيده الى كنت التمس فيها الحياديه!!!!

وعلى فكره, الشايع عندهم الثلث والله اعلم.

فتى الجبل يقول...

القبس جريدة ومن حقها الوقوف بصف اي مرشح ما يتعارض مع خطها السياسي
علما انها وقفت في بعض الاحيان ضد بعض ملاكها ومع الد اعدائهم
ياما اوقفت ضد الخرافي واهوا من ملاكها لصالح السعدون

Zaydoun يقول...

نفس ردة الفعل لما شفت المانشيت... يعني ما قلنا شي والريال والنعم فيه بس تو الناس على الصفحة الأولى

mtfa2el يقول...

و قبلها صفحتين تغطية حق الندوة
و اهو مصارخ و رافع ايده مع الجملة اللي محفظينه اياها
شاللي صااااير بالكويت ؟؟
قايلك money money

Mother Courage يقول...

صوتي لك عور يا بو مريوم

Mother Courage يقول...

هونت مو عور .. انت و زينات صدقي .. تستاهل

Don Juan يقول...

if you're lying and you know

clap your hands :p


keep it up بو مريوم عليكَ بِهِم ;)

JuVeNTiNa يقول...

هذي البيزات و ما تسوي .. هاهاها الصفحه الاولى الله يعين لو صج !!

و بعدين يصفق حق منو ! شهدا القرين و لا شباب اليد ؟! و لا يصفق حق نفسه !!

غير معرف يقول...

يسلم قلبه هثومي

enter-q8 يقول...

السالفه و ما فيها ان بو مريوم مدزوز من الغانم و الخرافي
اي نعم
انت عميل حق الغانم و الخرافي
ضد الهيثم الهيثم الهيثم ابن الشايع

للكويت شبابها
للكويت سرسريتها
للكويت فرعياتها
للكويت فضائينها

للكويت ستاربوكس

ولاّدة سابقاً ... رانيا السعد ...رانية المنيفي حسب الأوراق الرسمية يقول...

زيدون

لا والنعم فيه ولا قاله الله

الشاب باختصار: طبل
فاااااااااارغ

بو مريوم رئيس تحرير القبس زوجته -إذا ماني غلطانه- الشايع

Don Juan يقول...

لا تطوفكم صورة هيثم الشايع بجريدة الراي اليوم ... حقيقةً تحفة هالإنسان :p

راعي تنكر يقول...

http://www.alraimedia.com/PdfFiles/10530/p36.pdf

enter-q8 يقول...

بو مريوم انا قبل انا قبل

ابي هالمره عاد صج
مشكور راعي تنكر

بومريوم يقول...

esetch
بس عاجبك لانة شاب؟:)
اخ بس لو القى احد يلمعنى...

بدران
حقد طبقى متاصل فى العقل الباطن للخيشيين:)

سومدى
شكرا بس الطلب صعب

راعى التنكر
انت العجيب و الله:)
مشكور

مطقوق
الفلوووس
اخ بس لو عندى جريدة
جان اغررررررررررررد

كركوتا
انا مشكلتى مع الكذب و تزييف الحقائق
الجريدة صراحة ما ارضى علينا
سماط مجانى لمدة سنة:)

q8observer
حياك الله المكان مكانك
و احنا اللى نبى القبول منك و من كل القراء

فتى الجبل
كلامك عدل..و الدعم شى مشروع لاى جريدة
بس هل تعتقد ان حجم المانشيت يتناسب مع حجم الشايع؟او تصريحة؟

زيدون
تتوقع لى نجح القبس تسوى له ملحق اسبوعى؟
تخيل كل اثنين نفس قبل
ملحق هيثم

متفائل
الدولار لى حجى الكل يسكت

مذركورج
لا تحدونى انزل!
ترى انا على طريف...لو احصل خيمة عامودين و مكينة كهربا اسويها

don joun
مشكور...:)

حمودى
ما يذكرك بحفلات القرقيعان؟

انتر كيوايت
انا مع اللى يدفع اكثر
لو اى مرشح يعطينى 600 دينار اهد المدونة

ولادة
طبل صوتة عود..و تصريحاتة أكبر منة

راعى تنكر
استلمنا و تم التطبيق
مشكور:)

kuwaitiya يقول...

يبه الشايع قالوا حق كل جريدة "احنا نعلن عندكم سنويا ما يقارب 400 الف دينار" شنو عندكم حق ولدنا؟
فاكيد هذا الي عندهم حق ولدهم، صفحات اول ومليون صورة .. والاجوبة يكتبها د. شفيق الغبرا مدير حملته الي مقابل الادارة يحصل ما يقارب 200 الف!

الاسعار في الكويت خيالية، يعني حتى اعلانات حفل الاوسكار مو جذي والله .. مرزوقو مثلاً رح يعلن 3 اعلانات نص صفحة اولى في القبس تكلفة كل واحد 60 الف ..

والله لو يعطيني بس 60 الف وحدة، ينقذ حياتي كلها .. واكتبله اجوبة الحوارات احسن من الغبرا، صدقوني!

انت ما حضرت للشايع مرة؟
يقولك يطلع على المسرح مع حركة أضواء ويرفع ايده في السما ويقول "وينك يا عبدالله السالم؟"
على مستوى انتصار الشراح لين تقول "وينك يا يبه؟"

والله تعب الغبرا قاعد يضيع ع الفاضي .. يبه ولد الشايع وبيفوز حتى لو ما يحجي عربي!!

kuwaitya_7saweya يقول...

لووووووووووووووووووووول
افا عليك يحطوون لك مانشيتات يوميا
بس حلو العنوان الفضائي الصغير يظهر في خيطان