الخميس، أكتوبر 18، 2007

الحب فوق هضبة الهرم

"بومريوم يسلم الوزير الحميضي لوحة تمثل معاناة المواطن الخيشي"

فى لقاء مع جريدة الجريدة الحميضى يقول امس" وقال الحميضي في حديث لـ«الجريدة» إن الكويت تملك الامكانات المادية والبشرية الكفيلة بتحويلها الى مركز مالي وتجاري، لكن المشكلة الرئيسية التي تواجه الاقتصاد الكويتي تكمن في القوانين الجامدة الموجودة، التي ساهمت في الجمود وعدم الانفتاح على العالم الآخر،
انا كمواطن خيشى اتسائل, ليش الحكومة حاطة هدف انها تصير مركز مالى و اقتصادي؟
و هى تعلم ان الفكرة مستحيلة التطبيق
بحسبة ثانية..كم نسبة الاغنياء الى متوسطى الدخل بالكويت؟
الاغنياء الله يزيدهم بس ليش الحكومة حاطة هدف ان تزيد ثرائهم؟
ليش ما يكون الهدف مثلا جعل نظام التعليم فى الكويت الافضل عالميا؟
و هي فكرة سهلة التطبيق نسبيا و راح تخلى الكويت اجمل لنا و لعيالنا مو للمستثمر الاجنببى؟
انا ك مواطن خيشى ابى شيين بس
تعليم زين للورعان و رعاية صحية
الحكومة بكل وزراءها و طاقاتها حاطة هدف مستحيل,المستثمر الاجنبى
ليش ما تخلى اهدافها قابلة للتحقيق؟
انا اشبة الوضع كالتالى..واحد مفلس يبى يشترى سيارة
مع ان سيارتة بس يبيلها تواير يديدة
خلونا توايركم و شوفو وين بنوصلكم

هناك 18 تعليقًا:

ملاحـظـة يقول...
أزال المؤلف هذا التعليق.
Someday يقول...

Kalamik 3del, besides, I believe hal ma 6aleb that you are asking for are basics and once they are out of the way the rest will fallow smoothly, bs having so many problems and defining a goal that doesn’t even consider having a solution for our existing problems is el9ara7ah stupidity!!!

ملاحـظـة يقول...

امس البوست بالانجليزي
و اليوم مقابل وزير
ما يندرى باجر يمكن رئيس وزراء

بو مريوم
جنك بعت الكضيه؟؟


بره الموضوع: مو عبدالفتاح القصري وايد احلى بالقترة و العقال ؟

Diver يقول...

اسمعت لو ناديت حياة
ولكن لا حياة لمن تنادي

الحكومة بعيدة عن الناس العاديين او الخيشيين
لقراب يمها التجار و هم يبونن لكويت مركز تجاري
فالغني يزداد غنا و الفقير يزداد فقر
و الله المستعان

Barrak يقول...

مااعتقد راح يخلون لنا تواير

يمكن يخلون لنا الطاسه

أبو إسحق يقول...

يا خوفي من الانفتاح يصيح انكشاح للخيشيين يا خوي بومريوم

Bad-Ran يقول...

عاش نصير الشعب .. عاااش

شرقاوي يقول...

أثاريك طويل و سمباتيك، و عسى الله يرزقك مليار متليك.

بس العقال نازل شوية و مغطي كسرة الغترة.
_____
قوانين جامدة؟
من ساهم في تمرير القانون إلى الأمير ليصدق عليه و يصبح قانون،غير الحكومة.

لو تحدث المجنون ما يصدق

غير معرف يقول...

اول شي اذا صار المركز الاقتصادي المزعوم راح يعم الخير على الكل


وثاني شي صح كلامك عن التعليم


بس تدري وين المشكله ؟؟؟
ان السلطه مو هامها لا المركز الاقتصادي ولا التعليم ولا اي شي

ezain_kilah يقول...

بما إني لي الحين عايشة الدور إن الدنيا عيد وميتة من الحرة إن محد عبرني وعطاني لو ربع دينار عيدية, أحب أقولك... عيدك مبارك وتقبل الله طاعتك

ودامني عايدتك أكون شاكرتلك لو توضح لي شنو يعني "مواطن خيشي" وجانك بتجبر بخاطري وتعطيني عيدية تكسب فيني وفي أمة محمد أجر, لأن شكلي بأمشي وأعايد الأوادم لغاية ما يعطوني عيدية...والله

Shurouq يقول...

بو مريوم
العنوان وايد يايز لي

عيل طلعت شيوعي؟

LiL ALiEN يقول...

اذا كل وزرائك ونوابك تجار .. تبي احد يفكر فيك بعد؟

وبعدين انت انت ليش مو وطني؟ .. ليش تفكيرك دائما بالمواطن اللي الديره مو مستفيده منه شي؟ .. ياخي فكر بمشاريع ترفع اقتصاد البلد .. مو بشي كله يبي كل يبي ويرهق ميزانية الدوله

طلعت "حريري" يابومريوم

بومريوم يقول...

someday
هذى النقطة اللى بوصل لها
لا تخلونا نغرق بتطلعات و مشكاكل كبيرة و ننسى الاشياء الصغيرة المهمة
اشكرك على الاضافة

ملاحظة
انا ابيع روحي عشان الفلس:)
و انا ناوى اقابل رئيس الوزراء عشان اعرض علية مشروعي التقدمي
بس ناطر ايمع فلوس البشت

diver
المشكلة مو يزداد فقرا..المشكلة بمتطلبات الحياة الاساسية
عيدك مبارك...

barrak
قصدك راح يلبسونا الطاسة:)

بو اسحاق
عيدك مبارك
وين هالغيبة؟
الانفتاح راح يصير انضغاط
و لنا فى قطر و الامارات حكمة

bad-ran
ها انزل نفسي انتخابات الجمعية؟؟

شرقاوى
راح المتليك و ايامة
ابى عشر حكماء يديرون البلد بس
ما ابى رقم بالبنك

حمودى
شلون راح يعم على الكل؟
يعني انا..كمواطن ما عندى اسهم..و لا شركات..و لا حتي بسطة خضرة
شلون الانفتاح الاقتصادي راح يحسن حياتي؟

ezain_kilah

هذي عيديتك
و مواطن خيشي مثل مواطن مخملى
مجرد قطعة قماش فى نسيج المجتمع

شروق
عنوان جذاب لرواية كئيبة
و الفلم سوداوى اكثر

وين الشيوعية بالموضوع؟:)
هذا انتوا يا المخمليين..كل ما طالبنا بشى قلتوا عنه شيوعي

اللين
حلم يبا حلم
تغيرت و نسيت رفاقك بالمقامة ضد امبرالية القروض

Unbreakable Girl. يقول...

بومريوم

يعني تبيهم يتعبون ويخططون وما يدخل شي "يسوى" بجيوبهم؟ ..اطلب المستطاع

مدونة جدا رائعة...جدا جدا بعد، مع اني ما اكل التشريب

Mohammad Al-Yousifi يقول...

اتفق معاك لأول مرة في التاريخ

غير معرف يقول...

اقلها في توفير وضايف افضل بالقطاع الخاص
وحتى التصميم الي طايح بجبدك تستفيد منه باجر

فريج سعود يقول...

الحميضي اكبر جذاب وما يسوى تصور وياه لا يكون ما غسلت ايدك

بومريوم يقول...

Unbreakable Girl
حياك الله بالمدونة و مشكورة على الاطراء
مشكلتنا مو البوق و غلطان من يظن ان هذا هو السبب الوحيد

مطقوق
ان شاء الله ما تكون آخر مرة:)

حمودي
انا ما تكلم عن الجانب المالي
انا اتكلم عن اسلوب الحياة

بعدين من يقولك ان الشركات راح تفيد الاقتصاد الكويتى؟
روح شوف اللبنانيين بالكويت
حتى الكلينكس حق مطاعمهم اييبونه من لبنان

فريج سعود
مو بس جذاب
جذاب و يكرة المنتفين و عامة الشعب
سامعه باذنى